ah-búh og hva, rúmir tíu dagar eða svo

Já, blómateppið er tilbúið og meira að segja tæpar tvær vikur síðan það kláraðist :)

Tengdó komu líka með ákaflega fallegt teppi auk heimferðarpeysu og húfu. Ég fékk það verkefni að finna tölur á peysuna og þær leyndust í talnaboxi ömmu í Sigtúni :) Sömuleiðis er ég búin með peysuna sem ég var að prjóna (í dulítið stærri stærð) og sauma eitt sængurver utan um litlu ungbarnasængina sem amma á Akureyri lumaði á. Þar að auki prjónaði mamma svona líka fínan ermapoka með hettu, tilvalinn í vagninn. Ég á hins vegar alveg eftir að taka myndir af öllum þeim myndarskap, obbobobb...

Við höfum haft ýmislegt fyrir stafni síðan við komum til Íslands um miðjan júní. Hér eru nokkrar myndir til að bæta upp fyrir myndaleysið í síðasta bloggi:

Ásta vinkona var gæsuð með stæl. Verst ég missti af öllu fjörinu því ég var eiginlega lasin og þurfti að sooooofa. Ég rétt kíkti á gæsina í lok morgdegismatarins (þar sem grunlaus Ásta hélt að hún myndi hitta ömmu sína en ekki hóp af prökkurum sem klæddu hana í skrítin föt og drifu svo með í klifur, kanósiglingu, snú-snú, pylsugrill, sund og fajitas-partý).

Eftir ofátið á Silfurtunglinu (sjá síðasta blogg) fórum við með tengdó í labbitúr út á Laugarnestanga til að láta aðeins sjatna í okkur. Þau eru einstaklega myndarleg fjölskyldan:

Það þyrfti bara að líma Sylvíu einhvern veginn inn á myndirnar...

Sigurður náði líka ansi skemmtilegri skuggamynd af kúlunni.

Við fórum í innluttnings-/brúðkaupsgrillveislu hjá Unni og Krissa...

...sem auðvitað kallaði á innfluttnings-/brúðkaupstertu ;)

Þar var heldur betur gaman og mikið borðað og enn meira spjallað.

Þá eru ótaldar heilmargar heimsóknir í Sigtúnið, sund- og ísferðir og matarboð hjá pabba og mömmu, afmælisveisla 8 ára hnátu í Hveragerði, bumbuhittingar, pottasaumó (þ.e. saumó í heitapotti - verst ég missti af hinum dömunum í pottinum því ég var sú eina sem mætti á réttum tíma, ótrúlegt en satt!! en náði þeim í ísbúðinni síðar :) ) og bíóferð (Intouchables er frrrrrábær!). Nóg að gera... Á laugardaginn er svo brúðkaup Ástu og Tótu sem ég vona að ég komist í. Býst líka svo sem við að ganga einhverja daga fram yfir, svona miðað við fæðingasögu mömmu og tengdó. Tel mig a.m.k. vera búna að semja við krílið um að bíða í bumbunni fram yfir helgi. Fyrst ég komst ekki í gæsunina, þá verð ég nú að komast í brúðkaupið! ;)

Loks, fínasta bumbumynd í upphafi 39. viku:

(Nei, ég er langt í frá alltaf svona kát í bumbumyndatöku - spyrjið Sigurð! ;) )

En merkilegt nokk, þá stækkar kúlan bara og stækkar (hér þegar 35, 36, 37 og 38 vikum er náð)...

...en samt sést sama og ekki neitt sé litið beint aftan á mig. Ég verð að viðurkenna að ég hef lúmskt gaman af því!

þrír fjórðu og einn mánuður

Í dag er síðasti dagurinn sem ég ætla að þrjóskast við að reyna að vinna. Nokkuð viðeigandi því í dag er akkúrat mánuður í settan dag(!). Í næstu viku verð ég því komin í sumarfrí og get loksins spýtt í lófana með að klára blómateppið, litlu peysuna, lopapeysuna hennar Láru frænku, barnateppið úr blómateppisafgöngunum o.s.frv. Ekki það, ég hef sosum verið í hálfgerðu fríi þessa viku líka, en þó náð að gera eitthvað vinnutengt. Þarf "bara" að klára hlutina af í dag og koma þeim áfram á vinnufélagana...

Annars er náttúrlega ýmislegt búið að gerast síðan ég bloggaði þarna fyrir löngu. Það tókst að gera svona næstum allt fyrir Íslandsför. Einhvern veginn tókst okkur að troða öllu okkar hafurtaski ofan í tvær töskur, flugfreyjutösku og bakpoka án þess að vera með yfirvigt (í innrituðum farangri, það er að segja, ehemm... ;) ). Svo fór brottfarardagurinn í tiltekt og maraþonþrif á íbúðinni. Svo sannarlega hægt að mæla með því að fara í burtu í lengri tíma og leigja út íbúðina sína á meðan - leiðir til þess að afskekktustu krókar og kimar eru þrifnir og ótrúlegasta samansafn af (hálf)ónýtu dóti trillar út í ruslagám. Eina sem pirrar mig er að við náðum ekki að þrífa gluggana... En hvað um það, við lögðum af stað í rólegheitum og komumst stresslaust út á flugvöll tæpum 3 tímum fyrir brottför. Þurftum meira að segja að bíða í um korter þar til opnað var í farangursmóttökunni. Svo var nægur tími til að rölta um Kastrup, fá okkur að borða og svona. Við reyndumst svo heppin að fá eina sætaröð út af fyrir okkur í flugvélinni, svo ég gat kúrt mig niður í tvö sæti mest alla leiðina - orðin ansi þreytt eftir hasar daganna á undan. Þar sem ég lá þarna á bakinu skemmti krílið Sigurði með því að hendast um bumbuna og stinga hælunum lengst út í loftið. Gasalegt fjör ;)

Svo hefur tíminn farið í þetta venjulega, hitta fjölskylduna, borða skyr og fisk og lakkrís, fara í sund o.s.frv. ásamt því að vinna og koma sér smátt og smátt fyrir í íbúðinni hennar Bjarnheiðar systur (sem hún náði að skrifa undir kaupsamning á 6 klst áður en hún tók flugið yfir á meginland Evrópu!). Þetta er fallegasta íbúð, allt ytra byrðið nýuppgert (þ.e. útveggir, gluggar, svalir) en innréttingin og gólfefnið eru orðin ansi lúin, auk þess sem þarf að mála hana. En það er allt eitthvað sem má endurnýja og laga í rólegheitum allan ársins hring. Það var bara skverað inn rúmi, eldhúsborði, tveim stólum, eldhúsdóti og smá samansafni af húsgögnum í stofuna - svona þegar Sigurður var búinn að jafna sig að mestu á kvefinu sem tók á móti honum á Íslandi og ég var tekin við því...

Tengdó renndu í bæinn í gær í smá kaupstaðarferð áður en heyskapur fer á fullt skrið. Við fórum með þeim út að borða á Silfurtunglinu þar sem Maggi kærasti Hörpu systur Sigurðar kokkar. Ansi hreint notalegur veitingastaður. Það var rólegt þar í gærkvöldi, svo Maggi hafði tóm til að koma og sitja með okkur og rabba um stund. Ekki amalegt það og maturinn auðvitað sva-ha-ha-kalega góður. Mæli með þriggja rétta tilboðinu á Silfurtunglinu! (Sjávarréttasúpa, lungamjúkir lambaskankar og súkkulaðikaka með súkkulaðimús og hnetuís á bara 4000-kall.)

Jæja, best að koma sér að verki, svona ef ég á að ná að klára allt í dag! ;)

fimm áttundu

Jæja, þá er ég búin að hekla saman fimm áttundu af blómateppinu, allt á réttri leið þar.

Sigurður galdrakarl náði að tengja þvottavélina við bæði rafmagn og vatn. Notaðist þar m.a. við garðslöngu eins og nágrannar okkar þau Jara og Garðar. Já, maður reddar sér þegar "pípulagningar" eru annars vegar ;) Við settum vélina í gang núna í kvöld og hún malaði eins og köttur, hljóðlát og fín. Víííí! :)

Og ennþá meira "víííí": Sónar í fyrramálið! :D

rúmlega hálfnuð

Enn gerist lítið í teppaheklinu, en þó er ég búin að hekla saman rúmlega helming ferninganna. Nóg annað að brasa, líka allt í lagi að klára teppið bara á Íslandi. Mér reiknast til að það séu svona um 2 vinnudagar eftir sem ég þurfi til að klára það. Það er ekki neitt neitt :)

Og þá er ég held ég hætt í leikfiminni. Kúlan er farin að þvælast aðeins of mikið fyrir. Venjulega er ég endurnærð og voða hress og kát með að drífa mig í leikfimi, en síðustu skipti hef ég meira verið stolt af sjálfri mér að geta þetta ennþá... Hef á tilfinningunni að nú sé komið gott, svona áður en ég fer að asnast til að gera eitthvað af mér eða misstíga mig illa eða eitthvað álíka skemmtilegt. Svo er líka svo stutt í að ég komist í íslenskt sund sund sund (víííí!), ekkert mál að brúa bilið á milli með gönguferðum og smá hjóltúrum.

Annars er krílið bara hresst. Hnoðast til daginn út og inn en virðist gefa mér frí á nóttunni. Alla vega vakna ég a.m.k. ekki við bröltið þá. Það reyndi eitthvað að teygja á sér - og bumbunni þar með - í dag. Það hefur virkað áður, þá stækkaði legið slatta svo það fékk meira pláss. Ég er hrædd um að litli fjörkálfurinn verði fyrir vonbrigðum í þetta sinn, því mér skilst að legið geti ekki stækkað neitt voðalega mikið meira.

Í morgun var rafmagnslaust uppi í skóla milli 8 og 12. Einstaklega hljóðlátt og notalegt uppi á skrifstofu þá ;) Á morgun er svo þjóðhátíðardagur þeirra Svía og þar með frídagur. Ég ætla samt að vinna, því ég þarf væntanlega að taka einn dag frí fyrstu vikuna á Íslandi, gott að eiga frídag inni. Sigurður er líka í Ameríku á ráðstefnu, svo ég væri hvort eð er bara ein heima að rolast... Er svo á leiðinni í munnlegt próf á fimmtudaginn, sem á að fylgja eftir 5 tíma skriflegu prófi síðasta miðvikudag. Af frásögn þeirra sem eru búnir með sitt munnlega próf er það samt bara létt rabb, gjuggað í próflausnirnar en ekkert spurt út í efnið að ráði. Sem er svo sem ágætt, því skriflega prófið var aaaaaalltof langt. Grey kennarinn misreiknaði sig svona svakalega, prófið hefði þurft að vera 8 tímar í stað 5... En hann er annars svo ljúfur og góður að allir áttuðu sig á því að prófið yrði skalað, við bara sátum sveitt allan tímann og þurftum svo kælingu fyrir skrifhöndina á eftir ;)

Við förum í sónar eftir viku. Víhú! ég hlakka til :) Það er venjan að fara í sónar eftir 32 vikur hérna í Lundi, þ.e. ef maður kemst að áður en barnið fæðist... En frumbyrjur eins og ég komast víst eiginlega alltaf að á 33.-34. viku, sem stóðst líka hjá okkur :)

þrír fjórðu

Sem sé þrír fjórðu í meðgöngu, ekki í teppinu. Teppið hefur staðið í stað síðustu vikur, vantar 3 ferninga í að vera búin að hekla saman helminginn. Þetta skotgengur svona þegar ég kem mér í það, en það er búið að vera svo margt annað í gangi og á prjónunum undanfarið.

Kórinn lauk vetrarstarfinu með árlegum tónleikum á 1. maí í Konsthallen í Lundi og grillveislu á eftir. Það var fallegasta veður, þótt það væri ekki neitt svo hlýtt nema í sólinni. Alla vega mun hentugra veður til grillunar en í fyrra (þá byrjaði að rigna í fyrsta skipti í heilan mánuð akkúrat um það leyti sem fór að hitna í kolunum...). Tónleikarnir gengu líka ágætlega. Alltaf jafngaman að komast í sal með almennilegum hljómburði - ekki kennslustofu sem drepur allan óm niður eins og rýmið sem við æfum í :S

Í syngjandi sveiflu ;)

Svolítið oflýst, en notalegt í sólarblíðunni.

Ég fór í sykurþolspróf fyrir um einni og hálfri viku síðan. Það kom auðvitað allt glimrandi út úr því. Það kom mér annars á óvart að sykursulldrykkurinn sem maður þarf að drekka á fastandi maga var ekkert slæmur, svona þegar ég var búin að kreista úr eins og einni sítrónu út í hann. Bragðaðist þá bara eins og einhver íþróttadrykkur. Ég heklaði svo sama ferninga eins og vindurinn, þessa tvo tíma sem þurfti að bíða þar til blóðsykurinn var mældur.

Við Sigurður áttum 6 ára afmæli saman fyrir viku síðan. Ætluðum af því tilefni út að borða kvöldið áður, en ég nældi mér í eitthvert nebbkvebb þá helgina og var voða tuskuleg, svo við frestuðum þeim plönum. Við fórum í útskriftarveislu á föstudagskvöldið, hún Iskra úr hópnum hans Sigurðar var að klára doktorinn. Ósköp notalegt það. Létum svo verða af því að fara út að borða á laugardag, fórum strax klukkan fimm í rólegheitunum eftir búðarráp (jebbs, við erum voða rómantísk ;) ). Fórum á stað sem heitir Meat og fengum sæti við glugga þar sem verið var að heilsteikja grís á stéttinni fyrir utan. Ekkert slor útsýni það :) Og maturinn náttúrlega mjöööög góður.

Sumarið kom núna í gær, sunnudag. Sól og blíða og yfir 20°C. Í dag fór hitinn upp undir 25°C og það er sama í boði á morgun. Púff, hvað það verður gott að komast heim í íslenskar 10-15°C... :P Jebb, ég er mörgæs.

Annars líður tíminn við að gera lista yfir það sem búið er að redda og þarf að redda. Pælingar yfir burðarpokum, skiptitöskum, taubleyjum o.s.frv. og við bætist endalaus hringsnúningur í þvottavélamálum. Þar fyrir utan er náttúrlega vinnan og námið og próf í næstu viku (kræst!). Svolítið mikið að gera í augnablikinu. Ætli það verði það ekki alveg þar til við komum á klakann.

Að lokum, bumban eftir 30 vikur og 1 dag:

72 ferningar - ah búh!

Það er að segja, ah-búh í ferningaheklinu sjálfu. Nú er "bara" eftir að hekla þá alla saman... ;)


Annars hef ég verið með ýmislegt annað á prjónunum síðustu vikurnar og mánuðina. Tók mig til og skolaði úr afrakstrinum í gær.

Í alvöru, verður það mikið krúttlegra en þetta? Á reyndar eftir að sauma í miðjuna á peysunni, klippa (*andköf!*) og hekla lista með grænum blómatölum á. Hækka krúttstuðulinn þá enn meira. Núna eru pínkuponsu sokkar á prjónunum og lopapeysa á Láru frænku fer mjög fljótlega í vinnslu. Verður voða gott að hafa eitt verkefni á almennilegri prjónastærð svona með, ekki bara prjóna á tannstöngla endalaust ;)

Og í lokin, bumbumynd frá í gær (já, ég veit, grey naflinn!)

Fyrir áhugasama, þá vegur þessi kúla um 7 kíló, samkvæmt nýjustu ónákvæmu mælingum.

70 ferningar og 100 dagar

Jábbs, sléttir 100 dagar í settan dag.

Burðarrúmið í barnavagninn kom með póstinum í gær. Svoooooo ljúft að hafa það frá! Við þurfum bara að redda flugnaneti og sólskermi, og þá ætti allt að vera komið fyrir vagninn. Fundum bæði vagninn/kerruna og burðarrúmið notað, en alveg eins og nýtt, á netinu og borguðum um helming þess sem glænýtt sett myndi kosta út úr búð. Lúxuslíf :) Næst á reddingalistanum er þvottavél og þegar sá hausverkur er frá hugsa ég að allt annað á listanum verði eins og leikur einn...

69 ferningar

Þá hefur krílið fengið hiksta í fyrsta sinn, svo ég viti til a.m.k. Einstaklega skondið og krúttlegt, nema kannski fyrir það að það gerðist um klukkan 4 um nótt ;)

Ég gleymdi að segja frá því að við fórum í mæðraskoðun núna síðasta fimmtudag. Þar reyndist allt vera í stakasta lagi og stærðin á legbotninum (lengd yfir bumbuna, frá lífbeini og að toppnum á leginu) lenti nákvæmlega á meðalkúrfunni. Ég er sem sé einstaklega venjuleg og þægileg við að eiga á þessari meðgöngu. Næst á dagskránni er sykurþolspróf eftir rúmar 3 vikur og mæðraskoðun í framhaldinu.

Núna er ég komin í frí frá badmintoninu (sem ég spila annars á miðvikudögum með nágrannakonunum). Það var eitthvað farið að pirra tengingar í mjóbakinu að standa mikið með vinstri fótinn fyrir framan þann hægri. Ég var byrjuð að setja hægri fótinn fram í staðinn og beita mér þá eitthvað asnalega, svo það var betra að hætta áður en ég gerði eitthvað meira af mér. Skítt að missa af þessum æðislega félagsskap sem stelpurnar eru. Á hinn bóginn er ég enn nógu hress til að mæta í leikfimi og meira að segja skokka létt, svo ég held það sé best að kvarta sem minnst :) (Ég er sem sé ekki með nein grindarvandamál, fótapirring, bakverki, axlarverki, svefnvandamál, bjúg, ógleði, viðvarandi brjóstsviða, ógurlega löngun í sætindi og aðra óhullstu, skapsveiflur eða hvað eina annað sem lagst getur á konur á [seinni hluta] meðgöngu. Mig hrjáir í mesta lagi brjóstsviði svona 1-2 sinnum í viku og að ég vakna aðeins fyrr á morgnana en ég myndi vilja og einstaka sinnum um miðja nótt. Ég ætla að þakka þetta íþróttaástundun og almennilegri hreyfingu frá því ég var krakki ásamt góðum skammti af heppni.)

1. maí nálgast óðfluga með tilheyrandi vortónleikum kórsins. Það þýðir að kórinn tekur svolítið meiri tíma en venjulega en það er samt svo gaman þegar hlutirnir fara að smella saman. Æfingin á mánudaginn var þrusugóð og ef sú næsta verður þannig líka, þá hef ég litlar áhyggjur af tónleikunum. Hins vegar virðist það loða við kórinn að lögin verða einhvern veginn ekki fullæfð fyrr en á generalprufu eða hreinlega tónleikunum sjálfum. Kannski óþarfa aukaskammtur af adrenalíni það...

66 ferningar

Eitthvað mjakast heklið rólega áfram. Hef reyndar klórað mér svolítið í kollinum yfir hvernig ég vil tengja ferningana og gert prufur í gærkvöldi og í dag, er orðin nokkuð viss um hvernig ég ætla að hekla þá alla saman. En ég hef hreinlega ekki fundið tíma fyrir sjálfa ferningana síðustu daga, frekar heldur en bloggið. Enda ýmislegt í gangi.

Í morgun ætlaði ég svoleiðis að sofa út eftir heldur lítinn svefn undanfarna daga. Því var hins vegar lítill ólátabelgur ósammála. Ég rumsakði sem sé skömmu fyrir átta og nokkrum mínútum síðar upphófust þessar líka leikfimiæfingar hjá krílinu sem stóðu fram eftir morgni með nokkrum hléum. Svo ég gat ekki sofnað og ekki leið á löngu þar til garnagaul bættist í hóp friðarspilla. Þá þýddi ekki annað en lufsast á fætur og fá sér eitthvað í gogginn. Ég skreið reyndar aftur upp í rúm til að reyna að lúlla aðeins, en fékk þá bara aðra gusu af leikfimiæfingum til þess að skemmta mér við. Það er því greinilegt hverju þarf að taka á í uppeldinu... ;) Baunin hefur annars verið frekar róleg síðustu tvær vikurnar, svo dagurinn í dag er tekinn með trompi til að vinna upp afslappelsið.

Við Sigurður tókum því fremur rólega um páskana. Litum reyndar á handverkssýningu nokkurra íslenskra kvenna á litlu sveitakaffihúsi rétt hjá Veberöd.


Tókum strætó mest alla leiðina og gengum þá tæpan 1,5 km fram hjá túnum og í gegnum skóg til að komast á kaffihúsið. Röltum þar hjá hópi dádýra, voða gaman það.

Þegar að kaffihúsinu kom, kom í ljós að þar voru alls kyns dýr: villigöltur, kindur með lömb (gotlandsfé, ákaflega líkt því íslenska), geit með hoppandi káta 5 daga gamla kiðlinga, endur, gæsir, hænur og hanar, hundur og kanínur. Ég held ég sé ekki að gleyma neinu(?)






Við hittum þar líka Maríu og Helga kórfélaga mína og 3 ára guttann þeirra hann Svavar, sem voru svo indæl að bjóða okkur far aftur til Lundar.

Barn eltir hana - sá síðarnefndi hafði ekki svo gaman af þeim leik ;)

Við vorum hins vegar svo lengi úti í kuldanum (um 4°C) að skoða öll dýrin og svo var svo napurt að hjóla heim frá strætóstöðinni við sjúkrahúsið, að það dugði ekkert annað en bolli af heitu kakói og heitt bað til að hita kroppinn þegar heim kom. Brrr... páskahret.

Á páskadag tókum við því rólega með morgdegisverði, ég kláraði að prjóna litla peysu á krílið (á eftir að hekla lista og svona, mynd kemur síðar), við kíktum í ræktina/leikfimi, elduðum fínasta lambahrygg um kvöldið og fengum okkur heimagerðan toblerone-ís í eftirmat. Sllllúrp!


Annar í páskum fór að mestu hjá mér í það að sauma hlíf fyrir hrærivélina. Be-eh, hvílíkt maus sem mér tókst að gera þetta að :P

Eftir talsverða yfirlegu á blocket.se duttum við niður á vel meðfarinn og lítið notaðan barnavagn. Ég skellti mér til Málmeyjar á þriðjudagsmorgni til að kíkja á gripinn og kom heim vagninum ríkari, en nokkrum sænskum þúsundköllum fátækari. Þetta var reyndar bara vagn með kerrustykki, þ.e. það vantaði burðarrúm/vagnstykki á hann. Það er hins vegar fundið, sömuleiðis á blocket.se, alla leið norður í Skaraborg. Ætti að berast með póstinum í næstu viku. Það saxast smám saman á innkaupalistann...

33+30 ferningar

Já, ég hef alls ekki verið nógu dugleg við að hekla ferninga undanfarið. En, þeir duga samt núna í teppi sem er um 70x90 cm að stærð. Einn ferningur í viðbót og þá næ ég í 80x80 cm teppi. Níu í viðbót og teppið verður 80x90 cm. Það er ekki svo slæmt að hugsa til þess :)

Og nei, ég hef heldur ekki verið nógu dugleg við að blogga. Við vörðum síðustu helgi að mestu við að þræða verslanir í Lundi, Málmey og á netinu. Úff púff púff, ég var eiginlega alla vikuna að ná mér andlega eftir það :P Nú, og hvað geri ég þá þessa helgina? Jú, skelli mér í fleiri verslunarferðir! Jámms, sjálfspíningarhvöt á háu stigi hérna ;)

Við erum sem sé farin að skoða ýmislegt sem tengist komu litla krílisins. Efst á blaði þar er barnavagn, og ómæ ómæ hvílíkur frumskógur!!! Ég verð bara uppgefin við það eitt að hugsa orðið "barnavagn" :-o Hins vegar höfum við (held ég) komist að niðurstöðu um hvaða barnavagnar koma til greina og þá er bara að liggja á Blocket (vefsíða fyrir smáauglýsingar) og bíða eftir að "draumavagninn" detti inn á sölu í sæmilegu ástandi og ekki í einhverjum fáránlegum lit.

Annað sem er á innkaupalistanum er þvottavél. Helst þvottavél sem krefst þess ekki að við þurfum að kalla til marga iðnaðarmenn og ráðast í svakalegar framkvæmdir. Í augnablikinu þýðir það frekar nett og lágvaxin þvottavél inni í eldhúsi. Það eru nefnilega hvergi jarðtengdar innstungur í íbúðinni, nema í eldhúsinu. Bögg...

Svo verður næsti hausverkur væntanlega rimlarúm. Já já já, þetta er sko heilmikið fyrirtæki að fara út í barneignir ;)

Af náminu er það helst að við erum að leggja lokahönd á grein númer tvö í doktorsnáminu hjá mér. Stefnan er að senda hana inn til birtingar (eða höfnunar...) á morgun. Það verður mjööög ljúft að losna við greinina í smá tíma!

Að lokum, bumbumynd frá í dag þegar 23. vikan er að baki og tæpir fjórir mánuðir eftir. Mér skilst að eftir eina viku þá verði fóstrið nógu þroskað til að miklar líkur séu á því að það lifi af komi það í heiminn strax þá. Við skulum nú samt vona að það bíði í a.m.k. 14 vikur enn, engin ástæða til að flýta sér :)

29+30 ferningar

Já, þetta mjakast fram á við. Mesta furða að mér hafi tekist að hekla ferning þessa vikuna, það er búið að vera svo svakalega mikið að gera. Við erum að leggja lokahönd á grein, sem er nú hér um bil næstum alveg að verða tilbúin til að senda inn til birtingar. Svo er bara að sjá hvort einhver vilji birta þetta fyrir okkur. Ég efast reyndar ekki um að það takist einhvers staðar, það er bara spurning hversu ofarlega við náum að komast í goggunarröð tímaritanna.

Bumban vex út eins og nefið á honum Gosa. Ég tilkynnti Sigurði í morgun að nú fengi hann mikið ábyrgðarhlutverk: Að segja mér hvenær eru komnir blettir á bolinn minn fyrir neðan "bumbusjóndeildarhring"! Eitthvað leist honum reyndar illa á starfið, var snöggur að bjóðast til að kaupa handa mér spegil ;) Tsk-tsk-tsk, kauði ekki lengi að gera tilraun til að firra sig ábyrgð...

Lakkrísinn sem pabbi kom með hverfur hratt. Skuggalega lítið eftir. Auðvitað eiga óléttar konur ekki að borða of mikinn lakkrís (passa blóðþrýstinginn) og Sigurður lætur ekki sitt eftir liggja í aðstoðinni við að láta freistingarnar hverfa. Það er ábyrgðarhlutverk sem engin þörf er að skorast undan :D

blómateppi

Spurning um að endurvekja bloggið? Eða alla vega gera tilraun til þess, látum þar við sitja í bili ;)

Byrjum á núinu. Þessa helgi endurtókum við í Íslenska kórnum í Lundi leikinn frá í fyrra og skunduðum í kóræfingabúðir með Hreiðari Inga Þorsteinssyni. Svaka stuð, heilmikið puð, mikil gleði. Kórinn er alger áhugamannakór svo við hljótum að svahahakaleg viðbrigði fyrir Hreiðar ;) Í fyrra vorum talsvert fjær Lundi svo langflestir gistu og því var mikil stemmning á kvöldvökunni. Sófahornið hjálpaði þar líka til. Núna í ár vorum við mjög nálægt Lundi, og ekkert sófahorn, svo kvöldvakan var eitthvað hálfendaslepp. En það var þá þeim mun meira af rabbi og spjalli og súpi og prjónaskap og afsleppelsi, sem er líka ágætt.

Þessa dagana og vikurnar er ég með ýmislegt á prjónunum, að vanda, og meira að segja heklunálinni líka. Er að klára ungbarnahúfu, með tvær litlar peysur í huga, eina lopapeysu og svo blómstrað ungbarnateppi sem er sem sé heklverkefnið. Ég fékk hugmyndina að blómateppinu þegar við stelpurnar í saumó skelltum saman í ömmuferningateppi sem sængurgjöf fyrir eina okkar síðasta sumar. Ég lét það því eftir mér að missa mig í kambgarninu núna í jólafríinu. Verst að það er búið að vera heilmikið bras að fá marga kambgarnslitina frá því í haust, því það klikkaði eitthvað hjá Ístex. Til dæmis á ég engan fjólubláan. En ég á eina 25 liti af 38, sem verður að teljast ansi gott ;)



Nú er bara að krossa putta að mér takist að töfra fram 3-4 sinnum fleiri ferninga en ég er þegar komin með á næstu mánuðum. Ég hef reyndar fulla trú á að það hafist. Mamma er líka með í að hekla ferningana, mjög hentugt til að nota kambgarnsafganga sem hún átti. Saman ættum við að ná upp í 80-100 ferninga sem er þá mátulegt í mömmu-ömmu-teppi fyrir krílið sem hefur boðað komu sína í lok júlí :)

Minnst á krílið, kúlan tók þennan líka vaxtarkipp í þessari viku, fannst eins og hægt væri að sjá mun milli daga hreinlega. Enda bætti ég á mig 2 kg á innan við viku, jafn miklu og ég bætti á mig á fyrstu 19 vikum meðgöngunnar, takk fyrir pent! Í tilefni þessa er hér ein bumbumynd, tekin í dag þegar ég er gengin akkúrat 20 vikur - hálfnuð! :)


Þá er við hæfi svona að lokum að skella inn sónarmynd af bumbubúanum, tekin fyrir rúmum 2 vikum síðan.

hurðaskellir

Sjöundi var Hurðaskellir,
- sá var nokkuð klúr,
ef fólkið vildi í rökkrinu
fá sér vænan dúr.

Hann var ekki sérlega
hnugginn yfir því,
þó harkalega marraði
hjörunum í.

Jólasveinarnir virðast koma í þrenndum þetta árið. Eða ég man bara eftir þeim þriðja hvern dag ;) Ég mundi reyndar eftir Askasleiki í gær, en því miður var ég ekki í nánd við tölvu á því augnabliki (n.t.t. sitjandi í strætó). Útidyrahurðin skelltist nokkrum sinnum í dag í tilefni komu Hurðaskellis, eða þess að Sigurður skúraði og bónaði gólfið á hæla mín og ryksugunnar í gær. Við loftuðum hraustlega út í gær, en bónlyktin var ennþá svo sterk í morgun að ég ákvað að opna út á svalir og stóra stofugluggann og útidyrahurðina. Sigurði leist ekkert á þessa tilraun mína til að breyta íbúðinni í ísskáp og flúði út í búð að kaupa sér mjólk með morgunmatnum... Dagurinn hefur annars liðið í ýmsu jólastússi heima við og aðventukertin fjögur eru brunnin langleiðina niður í botn. Það snjóaði meira að segja það mikið í dag að snjórinn festist á jörðinni í fyrsta skipti þennan veturinn. Á morgun er það síðasti vinnudagurinn fyrir jólafrí - jibbí! :)

ketkrókur

Ketkrókur, sá tólfti,
kunni á ýmsu lag. -
Hann þrammaði í sveitina
á Þorláksmessudag.

Hann krækti sér í tutlu,
þegar kostur var á.
En stundum reyndist stuttur
stauturinn hans þá.

Þetta er búinn að vera ansi annasamur dagur, a.m.k. miðað við heimsókn hjá ömmu á Akureyri. Við Inga komum jólatrénu upp og skreyttum það, ég skellti mér í Bónus og Blómaval með ömmu (sem tekur náttúrlega um þrefalt til fimmfalt lengri tíma en venjulega því amma er amma og þar fyrir utan hitti hún frænku okkar og þá er amma líka amma og hefur gaman af að rabba lengi lengi - jafnvel þótt það sé t.d. ís og frostpinnar í skottinu á bílnum... ;) ) og svo brunaði ég í bæinn til að kaupa allra síðustu jólagjafirnar sem nást fyrir jól (jú jú, það verða 1-2 eftir-jólagjafir í ár). Bráðlega mun ég svo bruna áfram austur á bóginn í Ærlæk í Öxarfirði til Sigurðar míns og fjölskyldu. Yfir og út!

gluggagægir

Tíundi var Gluggagægir,
grályndur mann,
sem laumaðist á skjáinn
og leit inn um hann.

Ef eitthvað var þar inni
álitlegt að sjá,
hann oftast nær seinna
í það reyndi að ná.

Aumingja amma fékk ælupest í nótt og líður ósköp illa í dag, þótt hún sé hitalaus. Ósköp leitt :( Við Inga virðumst hafa sloppið hingað til (krossa putta!) Við skelltum okkur tvær í sund í morgun og ég tók þátt í sundleikfiminni fyrir ömmu. Við vorum bara þrjár, enda hefur snjórinn bara aukist. Risaskaflar og ruðningar upp um allt. Stuð að vera krakki á Akureyri núna ;) Við Inga ætlum að fá okkur bæjarrölt og sjá hvort einhverjar fleiri jólagjafir rati ofan í poka.

bjúgnakrækir

Níundi var Bjúgnakrækir,
brögðóttur og snar.
Hann hentist upp í rjáfrin
og hnuplaði þar.

Á eldhúsbita sat hann
í sóti og reyk
og át þar hangið bjúga,
sem engan sveik.

Við Inga frænka sváfum út í morgun meðan amma skellti sér í sund og sundleikfimi eins og venjulega. Þær voru þó bara þrjár í leikfiminni, snjór og jólastúss virðist halda mörgum heima. Við Inga fórum í sund eftir síðbúinn morgunmat, með viðkomu á pósthúsinu þar sem ég kom jólakortum í póst á síðasta degi til að senda kort innanlands, hvað annað ;) Sundið var yyyyyndislegt. Best í heimi :) Svo stússuðumst við Inga ýmislegt fleira, kíktum í bæinn þar sem ég fór í jólaklippinguna, litum við í Ásabyggðinni og komum svo við í Hrísalundi til að kaupa fisk í matinn. Það er alltaf svo notalegt hjá ömmu á Akureyri :)

askasleikir

Sá sjötti, Askasleikir,
var alveg dæmalaus. -
Hann fram undan rúmunum
rak sinn ljóta haus.

Þegar fólkið setti askana
fyrir kött og hund,
hann slunginn var að ná þeim
og sleikja á ýmsa lund.

Askasleikir sleppur inn á réttum degi miðað við íslenskan tíma ;) Dagurinn er búinn að vera svooolítið þéttpakkaður: Þvottatími kl. 7 í morgun, mjög áhugaverður fyrirlestur kl 9:15, jólaglögg og nemendakynningar í framhaldi af því, útbúa mitt eigið kennsluyfirlit ársins, hádegismatur, doktorsvörn Jonasar, maraþon tiltekt á skrifborðinu mínu og ákvarðanataka um hvað ég þyrfti að taka með heim, slembin strætóferð heim (strætó kemur bara þegar hann kemur þessa snjóþungu daga), fataskipti í einum hvelli, slembin strætóferð niður í bæ í veisluna hans Jonasar, heimferð um tíu, símtal í foreldrahús, síðustu umferðir á ungbarnateppinu handa krílinu hennar Hönnu, frágangur, skolun, hárnæringarbleytir, skolun og útbreiðsla teppisins til þerris, rabb við Bjarnheiði systur, jólasveinn dagsins. Sofa. Jólasveinaleiðangur niður í bæ á morgun.

pottaskefill

Sá fimmti, Pottaskefill,
var skrítið kuldastrá.
- Þegar börnin fengu skófir
hann barði dyrnar á.

Þau ruku upp, til að gá að
hvort gestur væri á ferð.
Þá flýtti' ann sér að pottinum
og fékk sér góðan verð.

Jæja, þetta hafðist allt. Fluginu seinkaði um rúmlega hálftíma, svo ég komst heim um ellefu og í bólið um hálf eitt, þ.e. ekkert svo rosalega seint. Ég náði því að skvera mér nógu snemma á lappir í morgun og með prófverkefnin upp í skóla í tæka tíð, fyrir klukkan 8:00. Það var allt í lagi veður í morgun en fljótlega fór að snjóa og hefur snjóað nær sleitulaust síðan svo nú er hægt að segja að það sé vetrarveður hérna. Spurning hvort ég muni hjóla eða spóla heim? Það verður alla vega stuð.

Annars beið mín óvænt ánægja þegar ég kom heim því Sigurður var búinn að taka íbúðina í jólatiltekt og -hreingerningu og meira að segja taka til á skrifborðinu sínu (við skulum ekkert minnast á ástandið á skrifborðinu mínu, dúddírarírei...). Ég ætti kannski að bregða mér oftar í burtu í svona nokkurra daga skreppitúra? ;)

veisla fyrir bragðlauka og hláturtaugar

Við Sigurður áttum 4 ára parafmæli í gær og ákváðum að fara út að borða og í bíó að sjá Hróa hött í tilefni dagsins. Ótrúlegt en satt þá datt okkur nokkurn veginn það sama í hug (ekkert svo óvanalegt) með nokkurra daga fyrirvara (mjöööög óvanalegt), þannig að við gátum valið veitingastað og bíó, pantað borð og keypt bíómiða (föst sætaskipan) tímanlega.

Í stuttu máli sagt þá var kvöldið yndislegt. Við fengum mjög gott borð út af fyrir okkur á Elysée í Málmey, maturinn var einfaldlega frábær (salatbar, smjörsteiktar tígrisrækjur í forrétt, nautasteik með shitake-sveppum og parmesan í aðalrétt og toblerone-mús með hindberjasósu í eftirrétt), rauðvínið sem pabbi mælti með (við sendum auðvitað vínlistann á sérfræðinginn) átti svo vel við for- og aðalrétt að við sammæltumst um að það væri hverrar krónu virði - a.m.k. ef keypt í ríkinu... ;) - og þjónustudaman okkar var svo indæl að við greiddum henni þjórfé þótt þess þyrfti ekki. Það smellpassaði að þegar við vorum búin að borga þá voru um 25 mínútur þar til bíómyndin byrjaði, en það var akkúrat tíminn sem Sigurður þurfti til að teyma meir en pakksadda Líneyju á lúsarhraða yfir í Entré-bíóið. Hróa hattar myndin var búin að fá svo misjafna dóma að við fórum á hana án nokkurra væntinga. Hún er ekkert meistarastykki, en ég skemmti mér konunglega (þakkaði fyrir hve fljótt sjatnaði í mallakút við það að rölta í bíóið, ég hló svo mikið) og langar til að sjá myndina aftur. Sigurður var að mestu sammála en það fór í taugarnar á honum hversu mikið er tekið beint úr myndinni Gladiator (sami aðalleikari og leikstjóri...) en hann er búinn að horfa svo oft á þá mynd að ég vil meina að hann sé ekki marktækur ;) Loks náðum við strætó aftur til Lundar beint eftir bíóið í stað þess að bíða í allt að hálftíma eins og við höfðum gert ráð fyrir. Yndislegt kvöld í alla staði :)

jólin hér, jólin þar...

Jæja, allir komust jólasveinarnir til byggða þótt seint væri. Netið hérna fyrir norðan er töluvert inn og út en þó mest úti og agalega hægt þegar það er inni. Það verður svona þegar allir námsmennirnir flykkjast heim í sveitina ;) Svo sat ég í bíl með tveim kvefgemlingum (Sigurði og Hörpu) alla leiðina frá Reykjavík til Ærlækjar og því varla hjá því komist en ég smitaðist - sér í lagi þegar maður er knúsaður í tíma og ótíma af einum áðurnefndra gemlinga. Ég var því dulítið lasin á aðfangadag, í fyrsta skipti svo ég muni til (atburðaminni mitt er reyndar arfaslakt svo takið þessa fullyrðingu hæfilega alvarlega). Ég ætlaði að vera komin í Grundargerðið til afa og ömmu í dag, en það varð auðvitað ekkert úr því með svoddan kvefaumingjaskap. Ekki vil ég smita gömlu hjónin og ég er nú ekki neitt sérstaklega skemmtilegur félagsskapur, hálfsofandi og eins og með blýklump í hnakkanum... :P En kannski ég verði ferðafær á morgun. Svo er stefnan sett á höfuðstaðinn fyrir áramótin, því Gunna og Summi bjóða í kalkún á gamlárskvöld eins og venjulega og það er ekki hægt að sleppa því :) En jamm og já, yfir og út áður en netið dettur út á ný ;)