jólafrí trallarí

Jólafríið mitt stóð frá 22. til 25. desember. Strax á annan í jólum byrjaði ég á að hita upp fyrir lokaárás á sumarverkefnið mitt hjá ÍSOR. Gaf mér samt tíma til að hafa það gott með Baldri bróður og fjölskyldu þegar þau komu í mat um kvöldið og spila með þeim púkk á eftir. Síðan hef ég setið yfir verkefninu frá u.þ.b. hálf ellefu að "morgni" og fram yfir miðnætti alla daga, með hléum til þess að borða, fara í sund, leika bílstjóra af og til o.s.frv. Að meðaltali hafa þetta væntanlega verið 8-9 klst á dag nema hvað í gær bakaði ég hinn árlega kastaníuhnetuhring og það rændi mig heilum tveim tímum (grrr...) og fór í afmæli Kristínar Þóru, svo þetta urðu ekki nema 6 klst. Ég stefndi á að klára í dag, en eins og ég bjóst fastlega við þá hefur herra Murphy bankað upp á nokkrum sinnum svo ég stórefast í augnablikinu :P Sjáum til, sjáum til... Almennilega fríið mitt hefst svo klukkan 7.45 að morgni 2. janúar þegar ég flýg norður á Akureyri til að slappa af með afa og ömmu og öðrum ættingjum þar. Að kvöldi 4. janúar eða þann 5. mun ég svo líklegast aka Hörpu, systur Sigurðar, og sjálfri mér í bílnum hennar austur á bóginn á Ærlæk. Tek svo flugið á sunnudagskvöldi, 7. jan., til að mæta í háskólann 8. janúar. Þetta verður nú meiri skreppitúrinn...

kertasníkir

Þrettándi var Kertasníkir,
-þá var tíðin köld,
ef ekki kom hann síðastur
á aðfangadagskvöld.

Hann elti litlu börnin,
sem brostu glöð og fín,
og trítluðu um bæinn
með tólgarkertin sín.

-- Gleðileg jól! --

ketkrókur

Ketkrókur, sá tólfti,
kunni á ýmsu lag. -
Hann þrammaði í sveitina
á Þorláksmessudag.

Hann krækti sér í tutlu,
þegar kostur var á.
En stundum reyndist stuttur
stauturinn hans þá.

Ég var svo þreytt eftir annarlok, jólpróf og jólagjafastúss gærdagsins að mér tókst svei mér þá að sofna eftir venjubundið "klukkan-7-rumsk". Steinsvaf þá með einu hléi til korter yfir ellefu en vaknaði þá bara af því að Sigurður fékk sms um breytta flugáætlun FÍ (flaug norður í dag með einungis klukkutíma seinkun). Annars hefði ég steinsofið fram á síðustu stundu, rétt fyrir 12, því ég trúi ekki að foreldrar mínir hefðu leyft mér að sofa af mér hina árlegu skötuveislu afa og ömmu í Sigtúni! Ofurlítið uppgefin manneskja á ferð ;P

En nú er það jólaskreyting og jólakortaföndur - jóla jóla jóla :D

gáttaþefur

Ellefti var Gáttaþefur,
- aldrei fékk sá kvef,
og hafði þó svo hlálegt
og heljarstórt nef.

Hann ilm af laufabrauði
upp á heiðar fann,
og léttur, eins og reykur,
á lyktina rann.

Prófin búin - tralliralliraoghoppoghíogfallila!
Við tekur: Jólin jólin alls staðar með jólastúss og gjafirnar ;)

gluggagægir

Tíundi var Gluggagægir,
grályndur mann,
sem laumaðist á skjáinn
og leit inn um hann.

Ef eitthvað var þar inni
álitlegt að sjá,
hann oftast nær seinna
í það reyndi að ná.

Eftir tæpa 8 klukkutíma mun ég segja: "Aaahhh...!"

bjúgnakrækir

Níundi var Bjúgnakrækir,
brögðóttur og snar.
Hann hentist upp í rjáfrin
og hnuplaði þar.

Á eldhúsbita sat hann
í sóti og reyk
og át þar hangið bjúga,
sem engan sveik.

Eins gott að hleypa Bjúgnakræki að áður en útlandasambandið rofnar... ;) Þessi líka spenna komin í netrápið - skyldi sambandið haldast??? Annars leiðinlegt með jólaveðrið, það virðist algerlega ætla að bregðast; rigning og rok og hátt í 10°C hiti. Þetta var svo jólalegt um síðustu helgi. En þá er bara að vona að veðrið verði skaplegra á gamlárskvöld með hæfilegu frosti og andvara til að dreifa púðurreyknum. Sjáum til.

skyrjarmur

Skyrjarmur, sá áttundi,
var skelfilegt naut.
Hann hlemminn o´n af sánum
með hnefanum braut.

Svo hámaði hann í sig
og yfir matnum gein,
unz stóð hann á blístri
og stundi og hrein.

Ojammojá, ekkert netsamband milli 10 og 14 í dag. Laglegt ástand. Annars er það í líneyskum fréttum helst að hnátan er orðin hundleið á próflestri. Skal það engan undra.

hurðaskellir

Sjöundi var Hurðaskellir,
- sá var nokkuð klúr,
ef fólkið vildi í rökkrinu
fá sér vænan dúr.

Hann var ekki sérlega
hnugginn yfir því,
þó harkalega marraði
hjörunum í.

Uhuhu, ég þarf að fara að læra á ný :( Neeei, ég er nú ekki svona mikill vælukjói, en hefði jú auðvitað alveg verið til í að vera búin í þessum prófum... ;)

Minnst á Hurðaskelli: Bjarnheiður, manstu eftir jólaballinu á Orkustofnun þegar Árni Hjartar lék Hurðaskelli og kom með eitt stykki beyglaða bílhurð upp á salinn? (Hann sagði sko að hann hefði komið með leigubíl og máski skellt hurðinni heldur harkalega aftur, alla vega varð hún eftir hjá honum þegar leigubíllinn ók á braut...) Skemmtilegasta jólaball sem ég hef farið á, slær meira að segja út hina stórskemmtilegu felu-/eltingaleiki á RALA-jólaböllunum með Dafnýju og Helga Tómasi :D

askasleikir

Sá sjötti, Askasleikir,
var alveg dæmalaus. -
Hann fram undan rúmunum
rak sinn ljóta haus.

Þegar fólkið setti askana
fyrir kött og hund,
hann slunginn var að ná þeim
og sleikja á ýmsa lund.

Jæja, loksins búið að redda netsambandi út í lönd. Ég var haldin þeirri ranghugmynd að það væri liðin tíð að netsamband við umheiminn lægi niðri klukkutímum saman... En onei-onei.

En hvað um það, Askasleikir komst til Epla&skyr-byggða í tæka tíð, svo þá er kannski hægt að fyrirgefa þetta sambandsleysi ;)

Gyðingakökur bökuðust gullinbrúnar, fagrar og gómsætar í gær og ég fór á jólasöngva Langholtskirkjukórs. Hef ekki gert það í a.m.k. tvö ár vegna jólaprófa og var þess vegna alveg í skýjunum yfir að komast núna í ár. Og ekki brugðust söngvarnir. Alltaf jafn gaman. Bragi Bergþórsson söng mjög vel, Ólöf Kolbrún er komin yfir tímabil of mikils víbrató og ekkert annað en fögur rödd og glæsileiki, Eivör söng með sínu nefi sem fyrr og Langholtskirkjukór og Gradualekór voru náttúrlega glimrandi. Annars heilmikil törn hjá grallarakórnum þarna í gær því þau sungu á fernum tónleikum: fyrst klukkan 14 og 17 á jólatónleikum Sinfó, og svo klukkan 20 og 23 á jólasöngvunum. Dugnaður.

Skora á ykkur að fara á a.m.k. eina jólatónleika núna í desember. Af nógu er jú að taka!

pottaskefill

Sá fimmti, Pottaskefill,
var skrítið kuldastrá.
- Þegar börnin fengu skófir
hann barði dyrnar á.

Þau ruku upp, til að gá að
hvort gestur væri á ferð.
Þá flýtti' ann sér að pottinum
og fékk sér góðan verð.

Algebran gekk ágætlega í gær. Lengri próftími kom sér vel (fékk lengri tíma út af "ofnæmisköstum" sem heilinn í mér á það til að fá af stærðfræðilegri rökhugsun undir of mikilli tímapressu). Eða ég held það alla vega. Virkar samt ofurlítið beggja blands, því hvar ætli öllum ofurprófstressuðum sé holað niður? Jú, í Lögbergi. Og þar, beint fyrir utan gluggann, er hópur kátra verkamanna að bora, fræsa, saga, öskra, æpa o.s.frv. í vinnu sinni við hið mikla háskólatorg. Þegar um ein og hálf klukkustund var liðin af próftíma kom alger hápunktur í djöfulganginn þarna úti og þá gekk frökenin sem sat yfir okkur á milli borðanna með plastvasa fullan af eyrnatöppum. Vesgú. Verst að eyrnatappar verka eins á eyru og heila í mér. Þ.e. stífla. Einhverra hluta vegna minnkar heilastarfsemin hjá mér svo mjög við að troða þessum þarfaþingum í eyrun að ég tek greinilega eftir því. Svo þegar tæpur klukkutími var eftir af prófinu hætti ég á að draga tappana úr mínum stirða kolli og viti menn, heilinn hrökk í gang um korteri síðar og leysti dæmi - en ég var búin að sitja í a.m.k. hálftíma með lausnina beint fyrir framan nefið á mér ritaða með eigin hendi án þess að fatta það, klórandi mér í kollinum. Þessi heili... En já, þetta gerðist þegar komið var 15 mínútur fram yfir venjulegan próftíma, svo nú má deila um hvort lengri próftími hafi hjálpað til við að vega upp á móti þessum tímapressuheilastirðleika eða hávaði&eyrnatappar komið í staðinn ;)

En hvað um það. Eftir að hafa etið síðbúinn hádegisverð skundaði ég í Smáralindina með mömmu. Þetta er í annað sinn sem hún móðir mín kemur inn í það hús, en held ég um 3-4 vikur síðan hún kom þangað í fyrsta sinn (og rak þá nefið bara rétt aðeins inn í Debenhams með mömmu sinni og systur hennar). Þar tókst að finna jólagjöfina mína: jóla-/árshátíðarkjól. Magnað. Það er nefnilega yfirleitt heljarinnar vesen að finna á mig kjól, en núna tók það innan við klukkustund. Eftir ofurlítið slór heimavið hélt ég svo í jólaboð Orkugarðs (þar sem ég hef unnið síðustu tvö sumur). Ákaflega gaman að hitta allt fólkið á ný og einnig ýmsa sem ég hef ekki spjallað við ansi lengi, því ég var náttúrlega hálft sumarið í "útlegð" í Potsdam núna í ár. Eftir kjaftaganginn og pinnasnarlið tók við kvöldsnarl heima, deiggerð (ætla að baka gyðingakökur í dag) og loks James Bond í bíó. Þetta er ansi hreint góð mynd. Meira ofbeldi en í fyrri myndum, en mun trúverðugri saga og skemmtilegri persónur. Heldur ekki þannig að annaðhvort er fólk vont eða gott. Sumir eru hvort tveggja og engu að treysta. Mun skemmtilegra þannig, ekki sami ævintýrabragur á þessu. Verst að myndin var ekki sýnd fyrr en níu í Regnboganum og var þá ekki búin fyrr en rétt fyrir miðnætti. Varla á það bætandi eftir heldur rýran svefn í þessari þriggja prófa törn undanfarið :P En hva, bara sofið, lúrt og kúrt þeim mun lengur frameftir ;)

----- 14:15:00 -----
Ahhh..., allt lita-, krækju-, breiddar-, leturgerðar-lagfæringarvesen búið :) Síðan er komin í sinn gamla búning!

þvörusleikir

Sá fjórði, Þvörusleikir,
var fjarskalega mjór.
Og ósköp varð hann glaður,
þegar eldabuskan fór.

Þá þaut hann eins og elding
og þvöruna greip,
og hélt með báðum höndum,
því hún var stundum sleip.

Obbosí, þvörusleikir gleymdist í mínu þétta skipulagi eftir algebruprófið :P En betra seint en aldrei...

stúfur

Stúfur hét sá þriðji
stubburinn sá.
Hann krækti sér í pönnu,
þegar kostur var á.

Hann hljóp með hana í burtu
og hirti agnirnar,
sem brunnu stundum fastar
við barminn hér og þar.

Minn uppáhaldsjólasveinn ;)

giljagaur

Giljagaur var annar,
með gráa hausinn sinn.
- Hann skreið ofan úr gili
og skauzt í fjósið inn.

Hann faldi sig í básunum
og froðunni stal,
meðan fjósakonan átti
við fjósamanninn tal.

Ragnar karlinn semur greinilega jafn ofvirk ef ekki ofvirkari próf en hann er sjálfur. Stærðfræðigreiningarprófin hafa verið sanngjörn og nokkuð stöðluð síðustu ár, en það er eitthvað sem segir mér að þetta próf verði skalað upp. Hann blés lengd dæma talsvert upp og jók þyngdina að auki. Allamalla. En þá er bara algebran á föstudaginn og svo er ég komin í mitt hálfgerða jólafrí. Ég tek því nefnilega nokkuð létt fyrir síðasta prófið, þetta var svoddan tætingsáfangi, og svo verður tímanum milli jóla og nýárs jú eytt í að ljúka *bííííp* sérverkefninu mínu frá í sumar. Er held ég barasta á því að ég skili því hvort sem það er fullklárað í mínum huga eður ei um áramót. Þetta verður komið gott og mig skiptir litlu eða engu hvort ég fæ þessar 5 einingar eða ekki. Mig langar jú til að fá smá frí. Ætla að fara norður yfir heiðar að heilsa upp á afa og ömmu á Akureyri, Hlyn og fjölskyldu og Hall og fjölskyldu, og enda svo á því að bruna á Ærlæk til Sigurðar.

stekkjastaur

Stekkjastaur kom fyrstur,
stinnur eins og tré.
Hann laumaðist í fjárhúsin
og lék á bóndans fé.

Hann vildi sjúga ærnar,
- þá var þeim ekki um sel,
því greyið hafði staurfætur,
- það gekk nú ekki vel.

Ég er að uppfæra síðuna. Réttir litir, krækjur og svoleiðis koma væntanlega einhvern tíma milli 15. og 21. desember þegar mér leiðist próflesturinn ógurlega... ;)

hæ hó og jibbíjei og jibbí íjei!

Ég er búin með skammtafræði 1. Fyrir þau ykkar sem ekki vita, þá er það sá áfangi í eðlisfræðináminu sem er alræmdur fyrir massíft vinnuálag, óskiljanleg dæmi og svínslegt próf. Dæmi: Þrælklár nemandi gat reiknað eitt og hálft dæmi af fjórum (einkunn gefin fyrir þrjú bestu) á prófinu þegar hann tók þennan áfanga. Kennarinn er frægur fyrir að hækka ekki upp á prófi, en neyddist til þess í þetta skipti. Hæsta einkunn var 8. (Já, þrælklári nemandinn fékk 8.) Og nú veit ég ekki alveg hvað ég á að halda, því prófið sem við fengum var, tjah, svei mér þá ef það var ekki mögulega hugsanlega sanngjarnt! Eitthvað sem ég hefði aldrei búist við. Og eftir að hafa skoðað prófið frá því í fyrra (ópent orðað: það var alger drulla), þá get ég með góðri samvisku sagt að mér hafi gengið vel á prófinu núna í morgun. Ha??? ganga vel í skammtafræði 1?!? Aldrei hefði ég trúað því að það væri hægt...
Þessu var svo fagnað með góðum hádegismat, glápi út í loftið, blaðalestri, sundferð, lúr, jólasmákökum og púsluspili. Það var ekki fyrr en eftir kvöldmat sem ég byrjaði að ganga frá skammtafræðidótinu og draga fram næsta fag, stærðfræðigreiningu. Það próf er núna á miðvikudagsmorgun. Ekki mikill tími fyrir það, en ég er alveg einstaklega kærulaus núna eftir að skammtafræðin er yfirstaðin. Næst er svo algebra I á föstudagsmorgni. Eins gott að kæruleysið verði runnið af mér fyrir það próf... Svo er ég í síðasta prófi á síðasta prófdegi, 21. des kl 13.30. Ég er þegar búin að leggja drög að kæruleysi fyrir það próf: Leit að jólakjól eftir góðan hádegismat að algebru lokinni 15. des., jólarabb og -smjatt Orkugarðs um hálf sex og James Bond í bíó að kvöldi. Smákökubakstur og jólasöngvar Langholtskirkjukóranna á laugardegi, og máski eins og ein heimsókn. Próflestur eftir það, væntanlega með einum og jafnvel tveim frídögum inn á milli.
Já, það er sko allt hægt þegar skammtafræðinni er lokið ;)

föstudagsfjör

Ég horfði fram á þennan feita og pattaralega dag á fimmtudagskvöldi og hugsaði innst inn: "úff..." Kæruleysi á föstudagskvöldi og ljúfur svefn á laugardagsmorgni ekki í boði þessa helgina. Svo var þetta nú ekki svo slæmt:

Mætt vestur í háskóla um hálf níu og farið beint upp á bókasafn að leysa skiladæmi í algebru I. Tími í algebru I milli 10 og hálf tólf, þá hádegishlé og svo rúmlega fjórfaldur skammtafræðidæmatími milli 13.20 og klukkan að verða fimm - með einu 20 mín hléi. Mikil þörf á næringu eftir það; fór út í féló og át appelsínu. Sat þar og sötraði næstum einn lítra af hvítölinu hans Sigurðar (sem honum fannst ekki gott) meðan ég hlustaði á einstaklega skemmtilegar bollaleggingar Ásu, Atla og fleiri Stigla um hvað væri hægt að gera milljón sinnum (eitthvað sem ekki hver sem er myndi gera milljón sinnum) og krafsaði meira í algebruna mína. Eftir að niðurstaða var fengin um
- að engum myndi endast aldur til að drekka milljón kaffibolla (jafnvel þótt þeir væru á stærð við expresso-bolla),
- hversu mörg baðkör af kaffi Atli væri búinn að drekka um ævina,
- að þar sem það munaði hlutfallslega svo litlu í kostnaði á því að keyra milljón kílómetra á Toyota Aygo eða eyðslumeiri og þægilegri bíl, þá myndi maður nú frekar velja þægindin...
...og algebrudæmin mín voru samasem leyst, skottaðist ég aftur upp á safn til að kíkja á tölvupóst og tex-a algebrudæmin (pikka á tölvu). Skammtafræðin sat greinilega enn eitthvað í mér, því ég skrifaði tvisvar sinnum Heisenberg í stað Eisenstein. Haldið heim á leið. Kvöldmatarafgangar runnu ljúflega niður og svo var pikkinu haldið áfram um hálf níu. Viljinn til þess þó greinilega eitthvað farinn að dala, því smáhlé til ýmissra annarra smáverka, dunds og slæpings urðu ansi mörg... Var þó lokið klukkan tíu. Þá tók við tilraun til að rúlla upp gömlu prófi í stærðfræðigreiningu: aukatími til að reikna gegnum tvö gömul próf framundan klukkan 9-12 að morgni laugardags. Þeirri vitleysu hætt á miðnætti og farið að sofa. Og svei mér þá ekki neitt gífurlega erfitt að vakna að morgni. Enda ekki verra að vakna við íslensk sönglög í flutningi Kristins Sigmundssonar og Jónasar Ingimundarsonar á gömlu góðu Gufunni... ;)

öhömm

Segir það mér eitthvað að á "Ferska" listanum hérna við hliðina á er enn þá titill bloggfærslu sem skrifuð var úti í Potsdam? Dúddúrú...

Ég verð annars að gefa ykkur krækju í þessa mynd sem ég er með sem skjáborðsmynd í tölvunni minni (ef þið viljið sjá aðra upplausn en 1024x768 þá getið þið valið hana á þessari síðu). Það er alveg dásamlegt að sjá þessa elsku þegar ég ræsi tölvuna ;)

húbbla

Kominn tími til að sýna smá lífsmark. Það er bara eitthvað svo lítið að frétta :S En kannski hægt að tína eitthvað til...

Fór á hádegistónleika í Norrænahúsinu í gær. Hljómsveit Hafdísar Bjarnadóttur lék þar 6 lög eftir Hafdísi (þar af eitt aukalag því þótt klukkan væri orðin eitt, þá bara urðum við að fá að heyra meira ;) ). Leitt hversu dræm mæting var. En lögin hennar Hafdísar eru brill. Ótrúlega fjölbreytt. Alls kyns stefnur og stílar :)

Að öðru leyti er ég á kafi í hinum breiða og stóra og (núorðið) venjulega námssúpupotti. Sit yfir tugblaðsíðna-löngum skammtafræðidæmum með harðsperrur á við hraustlega Vadim-"dry land"-æfingu (síðan í sundinu) eftir að hafa tekið vel á axla-, brjóst- og bakvöðvum, þríhöfða og tvíhöfða í fyrradag. Þarf nauðsynlega að komast í sund í dag til að liðka aumingjans vöðvafrumurnar mínar og tilheyrandi sinar.

Mamma verður með frænkukvöld annað kvöld og keppist við að baka kökur og smyrja brauðrúllutertur. Maginn í mér hoppar af kæti við tilhugsunina um alla afgangana ;)

En annars ef ég týni blogginu á ný innan um skammtakerfi, grúpur, bauga og afleiðujöfnur, þá má alltaf leita þangað sem margt er að frétta: draga andann djúúúúpt og skella sér í eina maraþonfærslu hjá Bjarnheiði systur ;D

sko

Ég hef yfirgefið Símann og flutt mig yfir til SKO. Ef þið reynduð að hringja eða senda sms í dag frá 12-20, þá var það árangurslaust því sauðurinn Líney skildi nýja sim-kortið eftir heima hjá sér. Sé svo til hvernig SKO stendur sig eftir áramót, hvort ég flytji mig aftur yfir til Símans.
Bara láta ykkur vita af flutningunum...

margt og mikið

Um það leyti sem ég skrifaði síðustu færslu var fyrsta skammtafræðiógeðsskammti annarinnar nýlokið. Síðan þá hefur annar skammtur runnið í gegn, töluvert þægilegri en sá fyrsti, ásamt ógrynni annarra verkefna. Ég hef líka steikt afmælispönnsur (með misgötóttum árangri), stýft taglið af við teygjuna, keypt mér fartölvu (sem ég sit við núna), kynnt undur eðlisfræðinnar fyrir gestum Vísindavöku, legið ofurlítið í leti, vafstrast í uppsetningu fartölvunnar (sem annars var í höndum Sigurðar nokkurs), spilað fótbolta og vakið við það hálsbólgu úr tveggja vikna dvala (arg!), hjálpað oggopínkuponsulítið við undirbúning kveðjuteitis Bjarnheiðar systur, setið í því um klukkutíma áður en ég stakk af á góðan en heldur langan Raunveru-fund (hagmunafélag nemenda í raunvísindadeild), kvatt Bjarnheiði systur og knúsað (farin til náms í stærðfræði við þýðverskan háskóla í Freiberg) og rænt rúminu hennar, passað húsið í fjarveru foreldranna (í Búlgaríu, endalaust flandur á fólkinu...), farið í abbskaplega notalegt afmæli til Ástu og soðið árlega tómatsósu úr 5,3 kg af tómötum (með þrem tilraunum til að sneiða af mér jafnmarga fingur og heilmiklum laukgráti).
Ojá, það er alltaf meir en nóg að gera ;)

sami titill og síðast...

Ojamm-ojá. Sumarprófið sem ég minntist á síðast er svo löööööngu búið að ég er meira að segja lööööngu búin að fá einkunnina í hús! (En kennarar eru jú yfirleitt ekkert að flýta sér þegar kemur að því að fara yfir sumarpróf...) Skýrslan sem ég vann að á ÍSOR síðan ég kom heim eftir Potsdam dvölina kláraði sig því miður ekki sjálf áður en sumartíma mínum þar lauk. Abbsasí. Svo ég verð bara að klára þetta sérverkefni mitt í hjáverkum nú í haust/vetur eða í jólafríinu (það síðasttalda yfirgnæfandi líklegast).

En ég hætti sem sé að vinna 24. ágúst. Brunaði þá um kvöldið ásamt Sigurði á hvítum (bif)reiðskjóta norður í land eða nánar til tekið á Ærlæk, rétt hjá Ásbyrgi og Kópaskeri, til að tölta upp og niður misstórar „þúfur“, veiða og liggja almennt með tærnar upp í loft í tæpa fjóra daga. Svo skemmtilega vill til að einhvern tíma þegar ég var pínu pons þá lét ég báta (tréfjalir með nagla og snærisspotta) fljóta á lítilli lækjarsprænu sem rennur við hlið skattstofubústaðarins svokallaða, í landi Ærlækjar. Afi og amma á Akureyri tóku þátt í að byggja hann, svo afi og amma og foreldrar hans Sigga þekkja þau ágætlega. Magnað.

En það var jú ýmislegt brallað, t.d. litið á Dettifoss

og sjálfsmyndataka stunduð

hoppað í berjamó

litið á eitt Grettisbæli í Forvöðum

og dáðst að Forvöðunum

gjugg!

rennt fyrir silung

róið út á vatn...

...til að leggja net

Sylvía yngri systir Sigurðar og aflakló

Botnstjörn í Ásbyrgi

og skeifan út

nammi namm!

afar og ömmur

Jón Dór pabbi

Guðný mamma

og Harpa eldri (samt yngri) systir (búin að útrýma krullunum um stund)

úbbs, hvert flaug tíminn?

Jæja jæja, heldur langt liðið frá síðasta pikki. Ekki að það hafi verið eitthvað tíðindalítið, ég er einfaldlega að rembast við að lesa fyrir sumarpróf eftir vinnu og um helgar, sem gengur að vísu eitthvað brösulega. En þá er blogg sem sé ekki efst á dagskrá...

Fyrir rúmri viku, þ.e. á fim. og fös., tölti ég ásamt Sæma (sumarmanni á ÍSOR) á eftir Rússanum Nikolai um fríðar grundir Hengilssvæðisins og klöngraðist yfir heldur óblíð hraun í Þrengslunum. Með misþungan bakpoka á bakinu og í misgóðu veðri (mest megnis rigningarsuddi og vindur/rok), eins og gengur. Tók mig einungis 5 kílómetra labb í gönguskóm að næla mér í þessi líka myndarlegu hælsæri. Skipti yfir í öllu mýkri stígvél og svo fór það bara eftir duttlungum líkamans hvort hann kvartaði yfir hælsærum, eymslum í vinstra hné, kulda eða hita :P Gekk m.a. tvisvar upp snarbratta hlíð Lambafells til að koma fyrir/ná í mælistöð. Sem betur fer blés vindurinn kröftuglega upp fjallshlíðina, ekki niður... En hvað sem öllu volki og aumingjaskap líður, þá var alveg óskaplega hressandi að komast í svolitla útivinnu :)

Sit annars allan heila vinnudaginn við tölvuna og reyni að skrifa skýrslu um mælingarnar úti í Potsdam. Það gengur mjöööööög hægt. Og þar að auki verð ég að skrifa skýrsluna í Word, út af linux-fötlun samstarfsmannanna úti í Potsdam. Arg.

En í dag eiga bæði mamma og Matthías hálfbróðursonur minn afmæli. Matthías meira að segja sitt fyrsta merkisafmæli - hann er 10 ára :) Til hamingju, mamma og Matthías! Slíkum tímamótum fylgja auðvitað miklar veitingar með tilheyrarndi ofáti. Sérstaklega þar sem afmælisbörnin eru tvö. En ég hef svo sem aldrei átt í vandræðum með að kýla vömbina... ;) Smjatt!

fjölgun

Á skrifstofunni við hliðina sitja tveir skemmtilegir náungar. Nú í vetur hafa þeir sett upp vel stórt fiskabúr og hafa þar 20-30 gullfiska af ýmsum stærðum og gerðum ásamt sniglum. Vitanlega er þess gætt að vatnadýrin hafi almennilegt landslag - stóra mynd af Reykjaneshryggnum :) Núna rétt áðan heyrðust mikil gleðióp frá þeim félögum. Fjórum litlum gullfiskaafkvæmum (af um 30) hafði tekist að komast af, þ.e. sleppa frá því að vera étnir af stóru fiskunum. Trikkið að vera með grófa möl í botninum þar sem smábörnin geta falið sig fyrst um sinn. Svo nú sitja þarna kampakátir nýbakaðir "feður". Alltaf gaman í vinnunni... ;)

forstýra?

Við heimkomu var mér vegna plássleysis plantað inn á skrifstofu aðstoðardeildarstjóra eðlisfræðideildar ÍSOR meðan hann rambaði um á tveim jafnfljótum um ægifagurt hálendi Íslands. Nú er hann væntanlegur til vinnu á morgun. Forstjóri ÍSOR er í frí til 21. ágúst (ég hætti að vinna 24. ágúst) en hann leit við til að spjalla um Potsdam-mælingarnar núna áðan. Hann sagði mér endilega að nota sína skrifstofu fyrst hann væri í fríi. Uuuu... hmm... tjah... kærar þakkir! En nei, ég held ég verði frekar á hálfgerðum vergangi en sitja á sjálfri forstjóraskrifstofunni, sama hversu tóm og ónotuð hún er ;D

frónbúinn

Jahá, næstum ein vika liðin síðan ég kom heim! Eina afsökun mín (sem er mjög góð afsökun) fyrir bloggleysi er sú að það er svo dásamlegt að koma heim í íslenskt veður, ferskt loft, göngtúra, sund, skokk (án þess að leka öll á gangstéttina), Sigurðarfaðm, pabba&mömmu-mat, sumarbústað, ... að alnetið gleymist svo til alveg. Ég mætti líka strax til vinnu eftir heimkomu (þ.e. á miðvikudaginn) og notaði allan fimmtudaginn í dagsferð og matarboð með þýskri kunningjakonu. Helgin leið hratt í leti, sundi, eldamennsku og hinu ljúfa lífi sumarbústaðarins: göngutúrum, ofáti, pottbleyti, sólböðum og spilamennsku. Annars held ég svei mér þá að ég hafi ekki legið almennilega í leti síðan um síðustu jól! Alla vega man ég ekki eftir slíkum degi síðan þá :P
En já, heima er bezt! ;)

líður að heimför

Jú jú, það eru einungis tveir dagar í að ég kem heim. Ætti að vera á leiðinni til Schönefeld-flugvallar með lestinni um þetta leyti eftir tvo sólarhringa. Sjáum til hvort mér takist að pakka einhverri sól, sumri og aukagráðum með í ferðatöskuna - hefur heyrst að það vanti eitthvað þess konar í höfuðborginni a.m.k.

En dagarnir líða því hjá mér núna helst við að kveðja fólk, þakka fyrir mig og saxa á "það sem þarf að gera fyrir brottför"-listann minn. Er reyndar flest allt komið nema ganga frá ýmsum gögnum í vinnunni, skila lyklum, þrífa herbergið mitt og pakka. Mikil gleði :)

Sjáumst!

toppgoði - toppsund

Á fimmtudaginn var tróð ég marvaðann í um 2 metra fjarlægð frá fugli er nefnist toppgoði
í u.þ.b. hálfa mínútu áður en hann stakk sér á kaf í grænleitt og lítt tært Heilagavatn (Heiliger See). Fyrir utan að öll heila sundferðin var frábær þá var þetta eitt af betri augnablikum dagsins. Ég mæli annars með þessari fuglamyndasíðu; reglulega fallegar myndir þarna.

glóandiheitar kveðjur

Það er 29°C hiti á skrifstofunni minni. Valið stóð milli 26°C og súrefnissnauðs lofts eða 29°C og súrefnisríkara lofts. Svo býður móðir náttúra upp á glampandi sól og 32°C. Nýju steikjandi hitahágildi er náð og ég ætla bara að vona að það sé víðfeðmt... ;)

loftmyndir

Ykkur til ánægju og upplýsingar eru hér nokkrar loftmyndir frá Potsdam. Og þeim sem halda að ég hafi þurft að fara í yfirlitflug yfir Potsdam til að redda þessum myndum fyrir ykkur, er bent á hið bráðsniðuga kortagoogle ;)
Hér á myndinni er stærri rauði hringurinn um húsið þar sem skrifstofan mín er, sá smærri er um "saununa" (skáli þar sem er eins og í saunu þessa dagana) þar sem tækin og tólin eru. Rauða línan er leiðin um steinlagðan akveg til að komast í mötuneytið (græni hringurinn), aðalbygginguna (norðan mötuneytis) eða áfram í mælingaskálann. Græna línan sýnir aðra leið um skuggsælan skógarstíg, ahh... ;)
Nyrsti rauði depillinn er þar sem ég bý, rauða línan sýnir leiðina í vinnuna og hinir deplarnir sýna annars vegar skrifstofuna og hins vegar saununa.
Hér sést hvar ég bý (rautt), hvar er mjög gott að henda sér út í vatnið Heiliger See (gult) og svamla um í sólinni meðal kviknakins fólks (kommúnísk gildi þar enn í hávegum höfð og þá heitir það jú bara félagi Jón og félagi Gunna), Schloss Cecilienhof (blátt) þar sem m.a. skipting Þýskalands eftir seinna stríð var ákveðin og rétt aðeins út af kortinu (bleikt) er Glienicker-brú þar sem Sovétmenn og Bandaríkjamenn skiptust á njósnurum á dögum kalda stríðsins. Þarna á myndinni sést líka aðalbrautarstöðin, Pfingstberg, Russische Kolonie, Neuer Garten, Nuthe Park, Park Babelsberg, miðbærinn, Tiefer See og Jungfernsee og ... en ég ákvað að láta þetta fernt bara nægja...

Annars gengur vinnan hér hægt en fer í rétta átt, sem fyrr. Samt getur verið talsvert erfitt að gera eitthvað af viti í yfir 30°C ... En þá er jú eitt ráð að skella sér til sunds í Heiliger See og vel þess virði að grillast á leiðinni þangað á hjólinu. Stefni á slíka sundferð á morgun :)

sólskinsdagar

Ég geng um í stuttbuxum og hlýrabol dag hvern, eins léttklædd og siðsamlega er mögulegt. Hjóla í vinnuna og svitna. Geng niður í matsal og svitna. Tek eitt skref og ... nei, kannski ekki svo slæmt ;) En ég væri meir en til í að skipta við ykkur frónlendinga. Ekki það, ég nýt sólarinnar í botn þegar ég rölti um svæðið hérna - svona þegar ég geng leiðir sem eru skuggsælar á köflum ;) Og það er ósköp notlegt að vinna á þessum stað. Hef fuglasöng sem tónlist, mýs skjótast einstaka sinnum yfir gangstígana, spörfuglar og svartþrestir vappa um allt, kanínur skoppa um grasflatirnar...

... og á sunnudagskvöldið sá ég meira að segja broddgölt þjóta eins hratt og hann gat inn í trjágróðurinn. Ósköp gaman :) Væri náttúrlega alveg til í að losna við mýflugurnar úr lífríkinu, en ætli þær verði ekki að fá að vera með...

Núna, að frádregnum 4 klst eru 3 vikur þangað til ég lendi á Íslandi á ný. Skemmtilegt :)

pikk frá Potsdam

Svo merkilega vill til að ég er algerlega hugmyndasnauð þegar ég ætla að skella inn færslu, en þegar ég er í vinnunni er heilinn afar blogg-frjór ;) Nú gríp ég tækifærið á mörkunum; er eiginlega hætt að vinna í dag en á bara eftir að senda einn tölvupóst.

Það lítur út fyrir að mér hafi eitthvað gengið að senda 5°C yfir hafið til Íslands, ég er alla vega hætt að kafna úr hita við það eitt að taka nokkur skref... ;) Núna er ég bara dauðþreytt. Hér mætir fólk nefnilega ekki í vinnuna fyrr en í fyrsta lagi hálf 9, sumir ekki fyrr en 10, hálf 11. Sem þýðir að þau hætta líka ekki að vinna fyrr en um 17 eða 18. Þá er ég of svöng og yfirleitt alltof heitt úti til að t.d. skokka. Ég vakna þess vegna yfirleitt kl hálf 7 til að fara í sund eða tölta einhvern hring hér í grenndinni. Hins vegar gleymist alveg að stytta sólarhringinn í hinn endann á móti... ;P

Á morgun mætir fólkið á ný til Ingu til að horfa saman á Þýskaland-Svíþjóð og grilla. Í þetta sinn verður leiknum þó varpað á vegg innandyra, enn of bjart úti kl 17... Ég er svo heppin að geta glaðst hvernig sem leikurinn fer - ég held nefnilega með báðum liðum ;) Gaman gaman.

Á miðvikudagskvöldið hittumst við annars nokkur heima hjá Silke...

...en hún átti afmæli, varð 37 ára :) Þar var náttúrlega grillað og spjallað og spilað (fótbolti og "boule") og almennt haft gaman. Nema kannski þegar mýflugurnar herjuðu á okkur skömmu eftir sólsetur... ;) 9 bit voru uppskeran mín, dúkkuðu upp hvert á fætur öðru í gær - baah :P En hvað gerir maður ekki fyrir góðan mat og góðan félagsskap, grín og gaman, ferskt loft og fallegan garð, notalega stund?

Og nei, ég ætla ekki að reyna að útskýra hver er hvað og hvernig allir eru tengdir þarna á myndinni ;) Nöfnin sjáið þið í heiti myndarinnar, lesið frá vinstri til hægri (NN stendur fyrir noname, þ.e. að ég greip ekki nafnið...).

E.S. Ég byrjaði á færslunni kl 17, þess vegna í/ekki í vinnunni... ;)

nokkrar fleiri myndir...

Veðrið er núna orðið þolanlegt. Var það alla vega um helgina :) Skilst að vísu að dagurinn í dag eigi að vera vel sveittur (30°C) en svo verða dagarnir góðir og vænir (20-25°C). Rölti m.a. um göngugötu Potsdam á laugardaginn og nartaði í jarðarber af markaðnum. Ég elska svona jarðarberjatíma, slúrp! :P Lá svo í sólinni á Freundschaftsinsel (Vináttuey) í gær; í stuttbuxum og bikinitopp frá hádegi til að verða fimm, pikkaði dagbók inn í tölvuna, hlustaði á velvalin Metallica- og Radiohead-lög (aaaafar lágt stillt, fyrir aðra gesti! ;) ) og naslaði jarðhnetur, ahhh...

Jarðarber í forrétt, jarðarber í eftirrétt, jarðarber í morgunmat, jarðarber í morgunnasl - er hægt að fá leið á ferskum jarðarberjum?

Þessar myndir gleymdust í gærkvöldi:

Stígurinn sem ég hjóla í vinnuna (sæmilega upp í móti - morgunleikfimi!)

Hliðið að svæðinu þar sem m.a. GFZ-rannsóknastofnunin er.

Skrifstofan sem ég sit í er handan hægrigluggans á framhlið hússins, 1. hæð.

Yfirleitt eru komnir "venjulegir" gönguljósakallar hér í Potsdam, en þarna stendur enn einn austur-þýskur Ampelmännchen :)

Þá tvær herbergismyndir, hér sú fyrri...

... og svo sú seinni.

Bakgarðurinn, séður út um gluggann minn. Bláa laugin er notuð bæði til að kæla börn og bjór ;)

myndir

Byrjum á vinnunni ;)

Sýni tilbúið til að stinga sér á haus í...

... olíu.

Harald við sýnið áður en það fór á haus.

Hér komið á kaf í olíu, allt tengt fínt og fallegt.

Tækin sem sýna P-bylgjuhraða og viðnám sem fall af tíðni.

Erik (hönnuður tækisins) að flippa smá og David (tengiliðurinn minn).

Skrifstofan sem ég deili með Ingu (jarðeðlisfræðingur)...

... en það var einmitt hún sem hélt grillpartýið þegar opnunarleikurinn á HM var. Hún stendur hér ásamt Ali við grillið.