ah-búh og hva, rúmir tíu dagar eða svo

Já, blómateppið er tilbúið og meira að segja tæpar tvær vikur síðan það kláraðist :)

Tengdó komu líka með ákaflega fallegt teppi auk heimferðarpeysu og húfu. Ég fékk það verkefni að finna tölur á peysuna og þær leyndust í talnaboxi ömmu í Sigtúni :) Sömuleiðis er ég búin með peysuna sem ég var að prjóna (í dulítið stærri stærð) og sauma eitt sængurver utan um litlu ungbarnasængina sem amma á Akureyri lumaði á. Þar að auki prjónaði mamma svona líka fínan ermapoka með hettu, tilvalinn í vagninn. Ég á hins vegar alveg eftir að taka myndir af öllum þeim myndarskap, obbobobb...

Við höfum haft ýmislegt fyrir stafni síðan við komum til Íslands um miðjan júní. Hér eru nokkrar myndir til að bæta upp fyrir myndaleysið í síðasta bloggi:

Ásta vinkona var gæsuð með stæl. Verst ég missti af öllu fjörinu því ég var eiginlega lasin og þurfti að sooooofa. Ég rétt kíkti á gæsina í lok morgdegismatarins (þar sem grunlaus Ásta hélt að hún myndi hitta ömmu sína en ekki hóp af prökkurum sem klæddu hana í skrítin föt og drifu svo með í klifur, kanósiglingu, snú-snú, pylsugrill, sund og fajitas-partý).

Eftir ofátið á Silfurtunglinu (sjá síðasta blogg) fórum við með tengdó í labbitúr út á Laugarnestanga til að láta aðeins sjatna í okkur. Þau eru einstaklega myndarleg fjölskyldan:

Það þyrfti bara að líma Sylvíu einhvern veginn inn á myndirnar...

Sigurður náði líka ansi skemmtilegri skuggamynd af kúlunni.

Við fórum í innluttnings-/brúðkaupsgrillveislu hjá Unni og Krissa...

...sem auðvitað kallaði á innfluttnings-/brúðkaupstertu ;)

Þar var heldur betur gaman og mikið borðað og enn meira spjallað.

Þá eru ótaldar heilmargar heimsóknir í Sigtúnið, sund- og ísferðir og matarboð hjá pabba og mömmu, afmælisveisla 8 ára hnátu í Hveragerði, bumbuhittingar, pottasaumó (þ.e. saumó í heitapotti - verst ég missti af hinum dömunum í pottinum því ég var sú eina sem mætti á réttum tíma, ótrúlegt en satt!! en náði þeim í ísbúðinni síðar :) ) og bíóferð (Intouchables er frrrrrábær!). Nóg að gera... Á laugardaginn er svo brúðkaup Ástu og Tótu sem ég vona að ég komist í. Býst líka svo sem við að ganga einhverja daga fram yfir, svona miðað við fæðingasögu mömmu og tengdó. Tel mig a.m.k. vera búna að semja við krílið um að bíða í bumbunni fram yfir helgi. Fyrst ég komst ekki í gæsunina, þá verð ég nú að komast í brúðkaupið! ;)

Loks, fínasta bumbumynd í upphafi 39. viku:

(Nei, ég er langt í frá alltaf svona kát í bumbumyndatöku - spyrjið Sigurð! ;) )

En merkilegt nokk, þá stækkar kúlan bara og stækkar (hér þegar 35, 36, 37 og 38 vikum er náð)...

...en samt sést sama og ekki neitt sé litið beint aftan á mig. Ég verð að viðurkenna að ég hef lúmskt gaman af því!

þrír fjórðu

Sem sé þrír fjórðu í meðgöngu, ekki í teppinu. Teppið hefur staðið í stað síðustu vikur, vantar 3 ferninga í að vera búin að hekla saman helminginn. Þetta skotgengur svona þegar ég kem mér í það, en það er búið að vera svo margt annað í gangi og á prjónunum undanfarið.

Kórinn lauk vetrarstarfinu með árlegum tónleikum á 1. maí í Konsthallen í Lundi og grillveislu á eftir. Það var fallegasta veður, þótt það væri ekki neitt svo hlýtt nema í sólinni. Alla vega mun hentugra veður til grillunar en í fyrra (þá byrjaði að rigna í fyrsta skipti í heilan mánuð akkúrat um það leyti sem fór að hitna í kolunum...). Tónleikarnir gengu líka ágætlega. Alltaf jafngaman að komast í sal með almennilegum hljómburði - ekki kennslustofu sem drepur allan óm niður eins og rýmið sem við æfum í :S

Í syngjandi sveiflu ;)

Svolítið oflýst, en notalegt í sólarblíðunni.

Ég fór í sykurþolspróf fyrir um einni og hálfri viku síðan. Það kom auðvitað allt glimrandi út úr því. Það kom mér annars á óvart að sykursulldrykkurinn sem maður þarf að drekka á fastandi maga var ekkert slæmur, svona þegar ég var búin að kreista úr eins og einni sítrónu út í hann. Bragðaðist þá bara eins og einhver íþróttadrykkur. Ég heklaði svo sama ferninga eins og vindurinn, þessa tvo tíma sem þurfti að bíða þar til blóðsykurinn var mældur.

Við Sigurður áttum 6 ára afmæli saman fyrir viku síðan. Ætluðum af því tilefni út að borða kvöldið áður, en ég nældi mér í eitthvert nebbkvebb þá helgina og var voða tuskuleg, svo við frestuðum þeim plönum. Við fórum í útskriftarveislu á föstudagskvöldið, hún Iskra úr hópnum hans Sigurðar var að klára doktorinn. Ósköp notalegt það. Létum svo verða af því að fara út að borða á laugardag, fórum strax klukkan fimm í rólegheitunum eftir búðarráp (jebbs, við erum voða rómantísk ;) ). Fórum á stað sem heitir Meat og fengum sæti við glugga þar sem verið var að heilsteikja grís á stéttinni fyrir utan. Ekkert slor útsýni það :) Og maturinn náttúrlega mjöööög góður.

Sumarið kom núna í gær, sunnudag. Sól og blíða og yfir 20°C. Í dag fór hitinn upp undir 25°C og það er sama í boði á morgun. Púff, hvað það verður gott að komast heim í íslenskar 10-15°C... :P Jebb, ég er mörgæs.

Annars líður tíminn við að gera lista yfir það sem búið er að redda og þarf að redda. Pælingar yfir burðarpokum, skiptitöskum, taubleyjum o.s.frv. og við bætist endalaus hringsnúningur í þvottavélamálum. Þar fyrir utan er náttúrlega vinnan og námið og próf í næstu viku (kræst!). Svolítið mikið að gera í augnablikinu. Ætli það verði það ekki alveg þar til við komum á klakann.

Að lokum, bumban eftir 30 vikur og 1 dag:

72 ferningar - ah búh!

Það er að segja, ah-búh í ferningaheklinu sjálfu. Nú er "bara" eftir að hekla þá alla saman... ;)


Annars hef ég verið með ýmislegt annað á prjónunum síðustu vikurnar og mánuðina. Tók mig til og skolaði úr afrakstrinum í gær.

Í alvöru, verður það mikið krúttlegra en þetta? Á reyndar eftir að sauma í miðjuna á peysunni, klippa (*andköf!*) og hekla lista með grænum blómatölum á. Hækka krúttstuðulinn þá enn meira. Núna eru pínkuponsu sokkar á prjónunum og lopapeysa á Láru frænku fer mjög fljótlega í vinnslu. Verður voða gott að hafa eitt verkefni á almennilegri prjónastærð svona með, ekki bara prjóna á tannstöngla endalaust ;)

Og í lokin, bumbumynd frá í gær (já, ég veit, grey naflinn!)

Fyrir áhugasama, þá vegur þessi kúla um 7 kíló, samkvæmt nýjustu ónákvæmu mælingum.

66 ferningar

Eitthvað mjakast heklið rólega áfram. Hef reyndar klórað mér svolítið í kollinum yfir hvernig ég vil tengja ferningana og gert prufur í gærkvöldi og í dag, er orðin nokkuð viss um hvernig ég ætla að hekla þá alla saman. En ég hef hreinlega ekki fundið tíma fyrir sjálfa ferningana síðustu daga, frekar heldur en bloggið. Enda ýmislegt í gangi.

Í morgun ætlaði ég svoleiðis að sofa út eftir heldur lítinn svefn undanfarna daga. Því var hins vegar lítill ólátabelgur ósammála. Ég rumsakði sem sé skömmu fyrir átta og nokkrum mínútum síðar upphófust þessar líka leikfimiæfingar hjá krílinu sem stóðu fram eftir morgni með nokkrum hléum. Svo ég gat ekki sofnað og ekki leið á löngu þar til garnagaul bættist í hóp friðarspilla. Þá þýddi ekki annað en lufsast á fætur og fá sér eitthvað í gogginn. Ég skreið reyndar aftur upp í rúm til að reyna að lúlla aðeins, en fékk þá bara aðra gusu af leikfimiæfingum til þess að skemmta mér við. Það er því greinilegt hverju þarf að taka á í uppeldinu... ;) Baunin hefur annars verið frekar róleg síðustu tvær vikurnar, svo dagurinn í dag er tekinn með trompi til að vinna upp afslappelsið.

Við Sigurður tókum því fremur rólega um páskana. Litum reyndar á handverkssýningu nokkurra íslenskra kvenna á litlu sveitakaffihúsi rétt hjá Veberöd.


Tókum strætó mest alla leiðina og gengum þá tæpan 1,5 km fram hjá túnum og í gegnum skóg til að komast á kaffihúsið. Röltum þar hjá hópi dádýra, voða gaman það.

Þegar að kaffihúsinu kom, kom í ljós að þar voru alls kyns dýr: villigöltur, kindur með lömb (gotlandsfé, ákaflega líkt því íslenska), geit með hoppandi káta 5 daga gamla kiðlinga, endur, gæsir, hænur og hanar, hundur og kanínur. Ég held ég sé ekki að gleyma neinu(?)






Við hittum þar líka Maríu og Helga kórfélaga mína og 3 ára guttann þeirra hann Svavar, sem voru svo indæl að bjóða okkur far aftur til Lundar.

Barn eltir hana - sá síðarnefndi hafði ekki svo gaman af þeim leik ;)

Við vorum hins vegar svo lengi úti í kuldanum (um 4°C) að skoða öll dýrin og svo var svo napurt að hjóla heim frá strætóstöðinni við sjúkrahúsið, að það dugði ekkert annað en bolli af heitu kakói og heitt bað til að hita kroppinn þegar heim kom. Brrr... páskahret.

Á páskadag tókum við því rólega með morgdegisverði, ég kláraði að prjóna litla peysu á krílið (á eftir að hekla lista og svona, mynd kemur síðar), við kíktum í ræktina/leikfimi, elduðum fínasta lambahrygg um kvöldið og fengum okkur heimagerðan toblerone-ís í eftirmat. Sllllúrp!


Annar í páskum fór að mestu hjá mér í það að sauma hlíf fyrir hrærivélina. Be-eh, hvílíkt maus sem mér tókst að gera þetta að :P

Eftir talsverða yfirlegu á blocket.se duttum við niður á vel meðfarinn og lítið notaðan barnavagn. Ég skellti mér til Málmeyjar á þriðjudagsmorgni til að kíkja á gripinn og kom heim vagninum ríkari, en nokkrum sænskum þúsundköllum fátækari. Þetta var reyndar bara vagn með kerrustykki, þ.e. það vantaði burðarrúm/vagnstykki á hann. Það er hins vegar fundið, sömuleiðis á blocket.se, alla leið norður í Skaraborg. Ætti að berast með póstinum í næstu viku. Það saxast smám saman á innkaupalistann...

33+30 ferningar

Já, ég hef alls ekki verið nógu dugleg við að hekla ferninga undanfarið. En, þeir duga samt núna í teppi sem er um 70x90 cm að stærð. Einn ferningur í viðbót og þá næ ég í 80x80 cm teppi. Níu í viðbót og teppið verður 80x90 cm. Það er ekki svo slæmt að hugsa til þess :)

Og nei, ég hef heldur ekki verið nógu dugleg við að blogga. Við vörðum síðustu helgi að mestu við að þræða verslanir í Lundi, Málmey og á netinu. Úff púff púff, ég var eiginlega alla vikuna að ná mér andlega eftir það :P Nú, og hvað geri ég þá þessa helgina? Jú, skelli mér í fleiri verslunarferðir! Jámms, sjálfspíningarhvöt á háu stigi hérna ;)

Við erum sem sé farin að skoða ýmislegt sem tengist komu litla krílisins. Efst á blaði þar er barnavagn, og ómæ ómæ hvílíkur frumskógur!!! Ég verð bara uppgefin við það eitt að hugsa orðið "barnavagn" :-o Hins vegar höfum við (held ég) komist að niðurstöðu um hvaða barnavagnar koma til greina og þá er bara að liggja á Blocket (vefsíða fyrir smáauglýsingar) og bíða eftir að "draumavagninn" detti inn á sölu í sæmilegu ástandi og ekki í einhverjum fáránlegum lit.

Annað sem er á innkaupalistanum er þvottavél. Helst þvottavél sem krefst þess ekki að við þurfum að kalla til marga iðnaðarmenn og ráðast í svakalegar framkvæmdir. Í augnablikinu þýðir það frekar nett og lágvaxin þvottavél inni í eldhúsi. Það eru nefnilega hvergi jarðtengdar innstungur í íbúðinni, nema í eldhúsinu. Bögg...

Svo verður næsti hausverkur væntanlega rimlarúm. Já já já, þetta er sko heilmikið fyrirtæki að fara út í barneignir ;)

Af náminu er það helst að við erum að leggja lokahönd á grein númer tvö í doktorsnáminu hjá mér. Stefnan er að senda hana inn til birtingar (eða höfnunar...) á morgun. Það verður mjööög ljúft að losna við greinina í smá tíma!

Að lokum, bumbumynd frá í dag þegar 23. vikan er að baki og tæpir fjórir mánuðir eftir. Mér skilst að eftir eina viku þá verði fóstrið nógu þroskað til að miklar líkur séu á því að það lifi af komi það í heiminn strax þá. Við skulum nú samt vona að það bíði í a.m.k. 14 vikur enn, engin ástæða til að flýta sér :)

blómateppi

Spurning um að endurvekja bloggið? Eða alla vega gera tilraun til þess, látum þar við sitja í bili ;)

Byrjum á núinu. Þessa helgi endurtókum við í Íslenska kórnum í Lundi leikinn frá í fyrra og skunduðum í kóræfingabúðir með Hreiðari Inga Þorsteinssyni. Svaka stuð, heilmikið puð, mikil gleði. Kórinn er alger áhugamannakór svo við hljótum að svahahakaleg viðbrigði fyrir Hreiðar ;) Í fyrra vorum talsvert fjær Lundi svo langflestir gistu og því var mikil stemmning á kvöldvökunni. Sófahornið hjálpaði þar líka til. Núna í ár vorum við mjög nálægt Lundi, og ekkert sófahorn, svo kvöldvakan var eitthvað hálfendaslepp. En það var þá þeim mun meira af rabbi og spjalli og súpi og prjónaskap og afsleppelsi, sem er líka ágætt.

Þessa dagana og vikurnar er ég með ýmislegt á prjónunum, að vanda, og meira að segja heklunálinni líka. Er að klára ungbarnahúfu, með tvær litlar peysur í huga, eina lopapeysu og svo blómstrað ungbarnateppi sem er sem sé heklverkefnið. Ég fékk hugmyndina að blómateppinu þegar við stelpurnar í saumó skelltum saman í ömmuferningateppi sem sængurgjöf fyrir eina okkar síðasta sumar. Ég lét það því eftir mér að missa mig í kambgarninu núna í jólafríinu. Verst að það er búið að vera heilmikið bras að fá marga kambgarnslitina frá því í haust, því það klikkaði eitthvað hjá Ístex. Til dæmis á ég engan fjólubláan. En ég á eina 25 liti af 38, sem verður að teljast ansi gott ;)



Nú er bara að krossa putta að mér takist að töfra fram 3-4 sinnum fleiri ferninga en ég er þegar komin með á næstu mánuðum. Ég hef reyndar fulla trú á að það hafist. Mamma er líka með í að hekla ferningana, mjög hentugt til að nota kambgarnsafganga sem hún átti. Saman ættum við að ná upp í 80-100 ferninga sem er þá mátulegt í mömmu-ömmu-teppi fyrir krílið sem hefur boðað komu sína í lok júlí :)

Minnst á krílið, kúlan tók þennan líka vaxtarkipp í þessari viku, fannst eins og hægt væri að sjá mun milli daga hreinlega. Enda bætti ég á mig 2 kg á innan við viku, jafn miklu og ég bætti á mig á fyrstu 19 vikum meðgöngunnar, takk fyrir pent! Í tilefni þessa er hér ein bumbumynd, tekin í dag þegar ég er gengin akkúrat 20 vikur - hálfnuð! :)


Þá er við hæfi svona að lokum að skella inn sónarmynd af bumbubúanum, tekin fyrir rúmum 2 vikum síðan.

stiklað á stóru

Jæja, loksins nenni ég að blogga aftur. Ætli ég reyni ekki að muna eftir helstu atburðum og gefa smá yfirlit. Gleymi samt örugglega einhverju. En hvað um það...

Blá blómabreiða og hjól sem erfitt er að stela - og nota - fyrir framan háskólabókasafnið. Fólkið hérna er ekki húmorslaust, sko... ;)

Byrjum fyrir rétt tæpum mánuði, þ.e. 24. apríl. Þá áttum við Bjarnheiður systir afmæli. Þar sem þetta var föstudagur, þá var "fika" (þ.e. kaka með kaffinu) klukkan þrjú á ganginum mínum upp í skóla. Ég var búin að semja við kökuumsjónarmann vikunnar, hana Yvonne, um að ég mætti mæta með kringlu, en ég var ekkert að segja henni að þetta væri hin (hér um bil) árlega afmæliskringla okkar Bjarnheiðar ;) Kringlan rann ljúflega niður í alla eðlisfræðingana og ritarana og Bergþóru vinkonu mömmu (sem hringdi um morguninn til að plata mig á kaffihús en ég fékk bara til að mæta í föstudags-fiku í staðinn), ásamt ávaxtakökunum hennar Yvonne og slatta af kaffi og tei.

Krásirnar skömmu áður en fólk hrúgaðist inn í eldhúsið og stútaði þeim af bestu lyst.

Rétt fyrir fjögur stakk ég svo af yfir í eina verkfræðibygginguna, því Sverrir (í kórnum) og Þóra (konan hans) buðu mér í grillveislu í góða veðrinu. Þangað mættu líka Finnur sonur þeirra Sverris og Þóru, Haukur (í kórnum), sonur hans og María sonardóttir, Freyr (í kórnum) og tveir synir hans. Þóra vinnur sem sé á verkfræðibókasafninu og ég fékk far með henni og Finni til Hjärup. Úr varð dásamlegt kvöld með óvæntum afmælisgjöfum og afmælissöng (Sverrir er sem sé afar duglegur á fésbókinni og þefaði afmælisdaginn minn uppi ;) ), rosalega góðum grillmat og meðlæti, kátu og skemmtilegu fólki og svo hreinlega grét ég af hlátri þegar Sverrir setti diskinn "Hundur í óskilum" í græjurnar. Þessi hljómsveit (eða dúó) er alger snilld!

Amminammi grillmatur og sól og sumar (f.v. Líney, Sverrir, Haukur, Freyssonur yngri, María, Finnur, Haukssonur, Freyssonur eldri og Freyr í felum - nöfn á Freys- og Haukssonum eru vel þegin... :P)

Uppúr þessari helgi, þ.e. 24.-26. apríl, gerðist ég innipúki af verstu gerð í þessari líka bongóblíðu sem varði næstu vikurnar. Ég er með birkifrjóofnæmi sem er í fína lagi á Íslandi en er gersamlega óþolandi í löndum með alvöru birkitrjám. Ég ruslaðist ekki til læknis til að fá almennileg lyf við þessu fyrr en 5. maí. Þá byrjaði líka að rigna eftir 3 vikna þurrkatíð (þurrkar=martröð frjófnæmisfólksins, því þá hreinsast fjóið ekki reglulega úr loftinu). Úje. Ég er þó komin með almennilegar töflur við þessu sem ég tek samviskusamlega, svona til öryggis ef ég þoli grasfrjómagnið hérna ekki, og er voða kát með að geta rekið nefið undir bert loft og opnað gluggann án þess að fá hnerrakast ;)

Það var margt um manninn í Lundagård þegar karlakór Lundarháskóla söng inn vorið.

1. maí er mikill merkisdagur hérna í Svíþjóð. Við Bergþóra fórum þá að hlusta á karlakór Lundarháskóla syngja við Lundagård (þar sem aðalháskólabyggingarnar eru). Það var ro-sa-lega flott, nema hvað stöð 4 var með beina útsendingu þaðan og skaut inn einhverju aukaefni og auglýsingum á milli og þá heyrðum við sem stóðum þarna bara talið, sem var ótrúlega hallærislegt. En svo söng kórinn líka við styttuna af stofnanda sínum og þá var engin sjónvarpsútsending, bara grín og glens í kórfélögunum :) Þetta var um kvöld og svolítið kalt, svo við yljuðum okkur með tei heima hjá Bergþóru á eftir.

Við Bergþóra, kátar að hlusta á karlakórinn syngja við styttu stofnanda kórsins - kórinn var stofnaður fyrir 200 árum!

4. maí var síðasta eiginlega kóræfing vetrarins hjá Íslendingakórnum hérna. Hún var haldin heima hjá meistara Draumeyju og allir mættu með eitthvað að borða fyrir kaffihléið. Ég gleymdi (ótrúlegt en satt!) að borða kvöldmat áður en ég mætti á æfinguna en ég sá ekki eftir því, það var svo margt gott að borða - og mikið af því! Æfingin varð náttúrlega óvenjulöng því við þurftum að kjafta svo mikið í kaffihléinu og syngja mikið því þetta var jú síðasta æfingin. Mikið svakalega var gaman :)

Einhvern tíma á þessu tímabili spilaði ég líka tvisvar fótbolta með fótboltaliðinu hennar Guðrúnar, Sparkling Motion, í háskóladeildarkeppninni. Sérlega hressandi og skemmtilegt, þótt ég þurfi nauðsynlega að taka góða törn í að sparka bolta í vegg eða heyrúllur því hittnin er orðin agaleg af æfingarleysi. En ég gat gert fínasta gagn þarna í vörninni. Get reyndar ekki sagt að hálftíma hlaup, hopp og skopp úti í góða veðrinu hafi verið sniðug fyrir fjóofnæmið, en hva... ;)

Við Bergþóra skelltum okkur á kaffihús á laugardaginn fyrir viku til að fagna próflokum hjá henni. Hún er sem sé í spænskunámi í háskólanum. Meiri dugnaðurinn í henni :) Á eftir litum við á hústökumótmælendur sem höfðu hótað hústökum í miðbæ Lundar svo það voru lögreglumenn út um allt í stórum bílum, fótgangandi og á hestum meira að segja. Það hef ég aldrei séð áður. Magnað.

Þennan sama laugardag buðu Guðrún og Jonas í grill og söngvakeppnisgláp. Þangað mættu líka María, Helgi og Svavar litli. Svavar var reglulega hress með fyrstu keppendur kvöldsins en sveif fljótlega með Óla lokbrá í draumalandið eftir súp hjá mömmu sinni ;) Við hin fylgdumst hins vegar með spennt, allt til enda og hrópuðum öll (mishátt) upp yfir okkur þegar Ísland fékk síðustu tólf stigin og hreppti 2. sætið. Geggjað fjör ;)

Dýrðlegt ofát í undirbúiningi (f.v. Guðrún, Jonas, Helgi, Svavar og María)

Núna á uppstigningardag var árleg grillveisla kórsins haldin hjá Hauki og Siggu konunni hans, og þar var auðvitað mikið fjör. Kórstjórinn okkar, hún Hulda Birna, varð fimmtug daginn áður svo það var auðvitað búið að útbúa afmælisgjöf handa henni og breyta einum söngtextanum fyrir hana (Draumey hélt utan um það allt, hún er snillingur). Birna er á leið til Víetnam í sumar og fékk því baðhandklæði, sólhatt, sólgleraugu, stuttermabol með fílamynd á, snyrtiveski með helstu nauðsynjum, sólarvörn, örugglega eitthvað fleira sem ég er að gleyma og svo minnigabók frá öllum kórfélögunum. Draumey sá um að klippa og líma allt saman og fylla upp í bókina með ýmsum spakmælum og nótum (öllum texta breytt í "jú jú jú..." því við fáum varla að syngja með texta hjá Birnu, bara "jú jú jú..." ;D ) svo úr varð ótrúlega falleg og skemmtileg bók fyrir hana Birnu. Rigningin var svo indæl að halda aftur af sér þangað til við vorum að klára að borða svo öll garð-"verk" náðust á undan hellirigningunni og við flúðum inn í hús. Ég hins vegar hjólaði heim í dembunni og var eins og hundur af sundi dregin að því loknu því Haukur og Sigga búa í Åkarp sem er um 30 hjólamínútur í burtu þaðan sem ég bý. Sérlega hressandi að hjóla í sturtunni ;)

Þar fyrir utan er það helst í fréttum að meistaraverkefnið mitt mjaaaaakast áfram, Kishor (Indverjinn sem leigir eitt herbergið í íbúðinni) er kominn heim frá Indlandi eftir að hafa gift sig og honum leiðist nú sem aldrei fyrr, baðherbergið er loksins loksins orðið nothæft eftir margra vikna viðgerðir og endurnýjun, ég fór út að skokka í dag eftir að ég held árshlé (út af fjárans hnjánum) og fann ekki fyrir neinum eymslum - úje! (skokkaði voða varlega og bara eftir malar- og moldarstígum). Þvílík hamingja :) Svo eru bara rétt rúmar þrjár vikur í að ég komi heim og þótt það sé óraunhæft að ég klári meistaraverkefnið fyrir þann tíma, þá ætti ég að komast langleiðina með það og standa mest í snurfusi er heim kemur (ehrm-hm, *krossa putta*!).

Segjum þetta gott í bili.

pistill í bjarnheiðskum stíl

Jæja... Jólin búin, nýtt ár gengið í garð og skólinn barasta byrjaður. Ðaldégnú. Fyrsta einkunnin skilaði sér fyrst núna í morgun, sem er pínu pirrandi, en þó vel skiljanlegt vegna óvenju "frívænnar" jólalegu og flandurs kennaranna til útlanda að leita uppi snillinga á borð við sjálfa sig. Þetta skilar sér allt á endanum.

Ég kýldi á maraþonjólakortagerð og smákökubakstur strax að loknu síðasta prófinu. Svo var farið í árlega jólaverslunarferð, með tilheyrandi stunum, æi, jæji, grettum, gjafaheilabrotum og sjálfsvorkunn. Ferðin gekk prýðilega fram til um klukkan fimm. Gjafirnar röðuðust einhvern veginn af sjálfu sér á hvern ættingja og mér tókst meira að segja að finna jólagjöf handa sjálfri mér, Sigurði til mikils léttis (ég er alger vandræðamanneskja þegar kemur að því að finna gjöf handa sjálfri mér). En nú nú, um fimmleytið lögðum við af stað úr miðbænum upp í Intersport á Ártúnshöfða til að athuga með síðustu gjöfina, þ.e. gjöf handa Sigurði frá mér. Við þóttumst vita að Hringbraut/Miklabraut væri stífluð og komum okkur út á Sæbraut í von um oggulítið betra umferðarflæði. Okkur til mikillar hrellingar komumst við að því að umferðin þar var á um 10 km/klst hraða frá mótum Sæbrautar og Laugarnesvegar og alla leið svo langt sem augað eygði. Við lulluðum þetta í um hálftíma en gáfumst upp þegar við vorum komin að Holtavegi, beygðum þar út úr bílaröðinni og komum okkur heim til pabba og mömmu þar sem við sátum um stund og sögðum "ga-a-a-a-a!" Mjah, kannski ekki alveg, en svona því sem næst ;) Við vorum boðin í fisk þangað um sjöleytið en matseldinni var einfaldlega flýtt til að bjarga sálarheill okkar. Jólakortavinnu og jólahreingerningu var lokið í kringum miðnætti og þá var barasta hrunið í bólið.

Okkur tókst að koma okkur af stað um hálf tíu morguninn eftir og að loknu smá snatti komumst við gegnum Mosfellsbæ um hálf ellefuleytið. Ferðinni var heitið norður á Ærlæk með smá stoppi á Akureyri og við hreinlega brunuðum þetta (á tiltölulega löglegum hraða) því færðin var eins og um haust - allir vegir auðir en rigningarsuddi mest alla leiðina til Akureyrar, nokkuð þurrt eftir það. Í Grundargerði var laufabrauðsskurður í fullum gangi hjá afa og ömmu, Hlyni, Kristínu, Huga, Lóu og Unu litlu (sem veitti andlegan stuðning ;) ). Við skiluðum nokkrum jólagjöfum og jólakæfu pabba af okkur og fengum heitt súkkulaði, brauð og kökur í hressingu. Náðum alla leið á Ærlæk um sex, hálf sjö en pústuðum þó ekki lengi, því klukkan átta var sýning unglingadeildar Öxarfjarðarskóla á söngleiknum Wake me up before you go go. Sýningin var snilld. Auðvitað hengu einsöngvararnir misvel í nótunum og sumir voru betri leikarar en aðrir, en ég skemmti mér konunglega :) T.d. var þetta mun skemmtilegra heldur en sýningin Leg í Þjóðleikhúsinu sem við Sigurður sáum fyrir ekki svo löngu. Og Sylvía stóð sig eins og hetja. Mig grunar að það hafi verið fleiri en einn og fleiri en tveir sitjandi í salnum sem voru að rifna af monti ;)

Sylvía söngdíva :)

Baldur í Klifshaga fór á kostum í hlutverki Tomma litla.

Svo hófst hin hrikalega skekking á sólarhringnum. Háttatími um þrjú, fjögur að nóttu og fótaferðatími eftir hádegi varð venja. Afslöppun, ýmislegt stúss úti í fjárhúsum, ótæpilegt sjónvarpsgláp, ofát, (fremur árangurslítil) framhaldsnámsleit, jóla-hitt og jóla-þetta og ýmislegt fleira létu dagana líða hratt og örugglega hjá. Það voru rjúpur í matinn á aðfangadag, þrátt fyrir litla veiði þetta árið, því það voru til nokkrar ársgamlar í frystigeymslu fjölskyldunnar á Ærlæk hjá Fjallalambi. Það er svo langt síðan ég fékk rjúpur að ég man ekki hvenær það var! En mikið voru þær góðar :)

Leiðinlega fólkið sem ekki vildi tala við Sylvíu sína. Sko bara, við erum meira að segja í stíl!

27. desember steig ég upp í rútu sem hélt í heldur blindum byl inn að Húsavík, þar sem önnur rúta flutti mig til Akureyrar til afa og ömmu. Þar náði afslöppunin hámarki, eins og búast mátti við :) Sund, spil, labbitúrar, bóklestur, heimsóknir í Ásabyggð og hellingur af mat einkenndu þá dvöl.

Ég gleymdi alveg að taka myndir í þetta sinn, en hér er ein síðan í fyrra af afa og ömmu á göngu í Kjarnaskógi.

Áður áætluð sunnanför þann 30. desember frestaðist til 31. desember út af hinu stuðmikla veðri. Þrátt fyrir hvassviðri og hálku á heiðum og blindhríð á Holtavörðuheiði, þá tókst okkur Sigurði og Hörpu að komast klakklaust til höfuðborgarinnar. Harpa hélt ásamt kærastanum sínum, honum Magga, áfram á Flúðir til foreldra hans en við Sigurður vippuðum okkur í sparifötin og renndum inn á Laugarnesveg til pabba og mömmu og Bjarnheiðar, þar sem sú síðastnefnda var að springa úr spenningi fyrir okkar hönd yfir innihaldi nokkurra jólagjafa sem þar biðu okkar. Ég á nú alveg dásamlega systur :D Nújæja, þegar pakkarnir höfðu verið opnaðir og við búin að hlæja dátt að glettnislegu innihaldi þeirra (afsakið, heldur langt að útskýra), þá fórum við í Sigtúnið til Gunnu frænku og Summa í hinn árlega áramótakalkún. Smjatt! Kvöldið þar leið ákaflega vel með sprengfullum mallakút og helling af bombum á himni, þrátt fyrir heldur hryssingslegt og lítt flugeldavænt veður. Og já, áramótaskaupið var nú ekki svo slæmt. Hvorki frábært né lélegt. Alla vega hló ég yfir meirihluta þess, að ég held, sem telst nokkuð gott. Það eina er að þessi atriði sem gera grín að sjónvarpsþáttum fara gjarna fyrir ofan garð og neðan hjá mér því ég horfi agalega lítið á svoleiðis, fyrir utan að t.d. (h)eldra fólk og vinnualkar grípa þau sjaldnast (af sömu sökum og ég), svo þau pirra mig pínulítið.

Frá áramótum hefur tíminn einhvern veginn liðið við át, svefn, sjónvarpsgláp og verslunarferðir við skoðun+kaup á leirtaui og hnífapörum. Við fengum nefnilega diska og skálar að gjöf frá móðursystrum Sigurðar og hnífapör frá foreldrum hans og vildum fullvissa okkur um að þetta væri það sem við værum sáttust við á markaðnum (jú jú, við erum bæði með hryllilega fullkomnunaráráttu í flestum fata- og búsáhaldainnkaupum sem passar ekki alveg nógu vel við hátt stig óþols á verslunarferðum... :P ;) ). Nújæja, hnífaparaviðskiptin urðu hin skemmtilegustu því við það að skila&skipta og skila unnum við okkur inn um 6500 kr. Ha, hvernig? Jú, við skiluðum fyrst hnífapörunum sem við fengum í jólapakkanum og fengum um 10.000 kr inneignarnótu. Hins vegar stóð á hillunni í verslunninni að viðkomandi hnífapör væru á tilboði, þ.e. hnífaparapakkarnir tveir áttu að kosta samtals 6000 kr og það var líka verðið sem foreldrar Sigurðar greiddu fyrir amboðin. Sem sé 4000 kr komnar þar. Við sáum í verluninni ágætis hnífaparasett, þ.e. svona hnífaparatösku með hnífum, göfflum, skeiðum, teskeiðum, kökugöfflum, súpuausu o.s.frv. og keyptum hana. Greiddum fyrir hana tilboðsverð, tæpar 6000 kr. Morguninn eftir sáum við að þótt hnífarnir væru vel öflugir, þá voru skeiðarnar og sérstaklega gafflarnir heldur veiklulegir og með vöðvabolta (aka böðul ;) ) eins og Sigurð á heimilinu myndi það þýða margar beyglaðar skeiðar og gaffla innan árs. Svo við fórum og skiluðum töskunni - og fengum inneignarnótu upp á venjulegt verð, 8500 kr! Þar bættust því við 2500 kr. Samtals fengust 6500 kr. (Ojú, hér hefðum við getað tekið upp á því að endurtaka þennan leik aftur og aftur og mokgræða, en við erum nú ekki svo óheiðarleg...!) Hnífaparasettið sem upphaflega kostaði 6000 kr var því orðið 12500 kr virði, þannig séð, svo við ákváðum að leita að verslun sem seldi ofurlítið sterklegri hnífaparasett. Römbuðum fyrst inn í Tékk Kristal, eftir ráðfæringar við foreldra á báðum vígstöðvum. Fundum þar hnífaparasett (tösku) sem uppfyllti allar kröfur - og kostaði 11900 kr á tilboði, gamla verðið var 17900 kr. Þ.e. ef menn vilja reikna okkur sem mest í hag, þá breyttust 6000 kr hnífapör í 18000 kr hnífaparasett ;D Síðustu daga hefur Sigurður ekki talað við mömmu sína án þess að vera spurður hvort hann sé enn í braskinu og hún móðir mín hlær dátt og líkir okkur við Silla í Spaugstofunni (níski kallinn sem gernýtir öll tilboð og passar vel upp á rétt sinn sem neytandi). Mikið stuð, mikið stuð ;)

myndasúpa

Þessa helgi og næstu viku verð ég á kafi að flokka, henda og pakka niður dóti, mest megnis náttúrlega dóti sem ég var búin að gleyma að væri til ;) Þar sem slíkt er lítt í frásögur færandi, skelli ég því inn nokkrum myndum ykkur til ánægju og yndisauka.

Esjuganga á afmælisdegi pabba. Við eins léttklædd og siðsemi leyfði.

En á toppnum var betra að smeygja sér í bolinn. Þetta líka fína útsýni!

Þjórsárdalur - labbilabb.

Geitungarnir voru alveg æstir í geithvönnina og litu ekki við okkur (hjúkk!) - sáum allt upp í sjö stykki á einum svona vendi.

Nokkuð magnað útsýni.

Erum við ekki sæt? ;)

Jón Dór, Sylvía og Guðný mættu okkur á miðri leið.

Litla, fína tjaldið okkar.

Félagsvist gerði rokna lukku ;)

Út í Viðey um verslunarmannahelgi. Nei nei, við lágum ekki bara í leti - við lásum skiltið þarna OG fylgdum því! (bara í hina áttina.)

Blómin blíð, Esjan fríð...

Læt þetta gott heita. Loks skal þess getið að í dag er afmælisdagur mömmu og Matthíasar frænda :)