Á fimmtudaginn var tróð ég marvaðann í um 2 metra fjarlægð frá fugli er nefnist toppgoði
í u.þ.b. hálfa mínútu áður en hann stakk sér á kaf í grænleitt og lítt tært Heilagavatn (Heiliger See). Fyrir utan að öll heila sundferðin var frábær þá var þetta eitt af betri augnablikum dagsins. Ég mæli annars með þessari fuglamyndasíðu; reglulega fallegar myndir þarna.
Það er 29°C hiti á skrifstofunni minni. Valið stóð milli 26°C og súrefnissnauðs lofts eða 29°C og súrefnisríkara lofts. Svo býður móðir náttúra upp á glampandi sól og 32°C. Nýju steikjandi hitahágildi er náð og ég ætla bara að vona að það sé víðfeðmt... ;)
Ykkur til ánægju og upplýsingar eru hér nokkrar loftmyndir frá Potsdam. Og þeim sem halda að ég hafi þurft að fara í yfirlitflug yfir Potsdam til að redda þessum myndum fyrir ykkur, er bent á hið bráðsniðuga kortagoogle ;)
Hér á myndinni er stærri rauði hringurinn um húsið þar sem skrifstofan mín er, sá smærri er um "saununa" (skáli þar sem er eins og í saunu þessa dagana) þar sem tækin og tólin eru. Rauða línan er leiðin um steinlagðan akveg til að komast í mötuneytið (græni hringurinn), aðalbygginguna (norðan mötuneytis) eða áfram í mælingaskálann. Græna línan sýnir aðra leið um skuggsælan skógarstíg, ahh... ;)
Nyrsti rauði depillinn er þar sem ég bý, rauða línan sýnir leiðina í vinnuna og hinir deplarnir sýna annars vegar skrifstofuna og hins vegar saununa.
Hér sést hvar ég bý (rautt), hvar er mjög gott að henda sér út í vatnið Heiliger See (gult) og svamla um í sólinni meðal kviknakins fólks (kommúnísk gildi þar enn í hávegum höfð og þá heitir það jú bara félagi Jón og félagi Gunna), Schloss Cecilienhof (blátt) þar sem m.a. skipting Þýskalands eftir seinna stríð var ákveðin og rétt aðeins út af kortinu (bleikt) er Glienicker-brú þar sem Sovétmenn og Bandaríkjamenn skiptust á njósnurum á dögum kalda stríðsins. Þarna á myndinni sést líka aðalbrautarstöðin, Pfingstberg, Russische Kolonie, Neuer Garten, Nuthe Park, Park Babelsberg, miðbærinn, Tiefer See og Jungfernsee og ... en ég ákvað að láta þetta fernt bara nægja...
Annars gengur vinnan hér hægt en fer í rétta átt, sem fyrr. Samt getur verið talsvert erfitt að gera eitthvað af viti í yfir 30°C ... En þá er jú eitt ráð að skella sér til sunds í Heiliger See og vel þess virði að grillast á leiðinni þangað á hjólinu. Stefni á slíka sundferð á morgun :)
Ég geng um í stuttbuxum og hlýrabol dag hvern, eins léttklædd og siðsamlega er mögulegt. Hjóla í vinnuna og svitna. Geng niður í matsal og svitna. Tek eitt skref og ... nei, kannski ekki svo slæmt ;) En ég væri meir en til í að skipta við ykkur frónlendinga. Ekki það, ég nýt sólarinnar í botn þegar ég rölti um svæðið hérna - svona þegar ég geng leiðir sem eru skuggsælar á köflum ;) Og það er ósköp notlegt að vinna á þessum stað. Hef fuglasöng sem tónlist, mýs skjótast einstaka sinnum yfir gangstígana, spörfuglar og svartþrestir vappa um allt, kanínur skoppa um grasflatirnar...
... og á sunnudagskvöldið sá ég meira að segja broddgölt þjóta eins hratt og hann gat inn í trjágróðurinn. Ósköp gaman :) Væri náttúrlega alveg til í að losna við mýflugurnar úr lífríkinu, en ætli þær verði ekki að fá að vera með...
Núna, að frádregnum 4 klst eru 3 vikur þangað til ég lendi á Íslandi á ný. Skemmtilegt :)
Svo merkilega vill til að ég er algerlega hugmyndasnauð þegar ég ætla að skella inn færslu, en þegar ég er í vinnunni er heilinn afar blogg-frjór ;) Nú gríp ég tækifærið á mörkunum; er eiginlega hætt að vinna í dag en á bara eftir að senda einn tölvupóst.
Það lítur út fyrir að mér hafi eitthvað gengið að senda 5°C yfir hafið til Íslands, ég er alla vega hætt að kafna úr hita við það eitt að taka nokkur skref... ;) Núna er ég bara dauðþreytt. Hér mætir fólk nefnilega ekki í vinnuna fyrr en í fyrsta lagi hálf 9, sumir ekki fyrr en 10, hálf 11. Sem þýðir að þau hætta líka ekki að vinna fyrr en um 17 eða 18. Þá er ég of svöng og yfirleitt alltof heitt úti til að t.d. skokka. Ég vakna þess vegna yfirleitt kl hálf 7 til að fara í sund eða tölta einhvern hring hér í grenndinni. Hins vegar gleymist alveg að stytta sólarhringinn í hinn endann á móti... ;P
Á morgun mætir fólkið á ný til Ingu til að horfa saman á Þýskaland-Svíþjóð og grilla. Í þetta sinn verður leiknum þó varpað á vegg innandyra, enn of bjart úti kl 17... Ég er svo heppin að geta glaðst hvernig sem leikurinn fer - ég held nefnilega með báðum liðum ;) Gaman gaman.
Á miðvikudagskvöldið hittumst við annars nokkur heima hjá Silke...
...en hún átti afmæli, varð 37 ára :) Þar var náttúrlega grillað og spjallað og spilað (fótbolti og "boule") og almennt haft gaman. Nema kannski þegar mýflugurnar herjuðu á okkur skömmu eftir sólsetur... ;) 9 bit voru uppskeran mín, dúkkuðu upp hvert á fætur öðru í gær - baah :P En hvað gerir maður ekki fyrir góðan mat og góðan félagsskap, grín og gaman, ferskt loft og fallegan garð, notalega stund?
Og nei, ég ætla ekki að reyna að útskýra hver er hvað og hvernig allir eru tengdir þarna á myndinni ;) Nöfnin sjáið þið í heiti myndarinnar, lesið frá vinstri til hægri (NN stendur fyrir noname, þ.e. að ég greip ekki nafnið...).
E.S. Ég byrjaði á færslunni kl 17, þess vegna í/ekki í vinnunni... ;)
Veðrið er núna orðið þolanlegt. Var það alla vega um helgina :) Skilst að vísu að dagurinn í dag eigi að vera vel sveittur (30°C) en svo verða dagarnir góðir og vænir (20-25°C). Rölti m.a. um göngugötu Potsdam á laugardaginn og nartaði í jarðarber af markaðnum. Ég elska svona jarðarberjatíma, slúrp! :P Lá svo í sólinni á Freundschaftsinsel (Vináttuey) í gær; í stuttbuxum og bikinitopp frá hádegi til að verða fimm, pikkaði dagbók inn í tölvuna, hlustaði á velvalin Metallica- og Radiohead-lög (aaaafar lágt stillt, fyrir aðra gesti! ;) ) og naslaði jarðhnetur, ahhh...
Jarðarber í forrétt, jarðarber í eftirrétt, jarðarber í morgunmat, jarðarber í morgunnasl - er hægt að fá leið á ferskum jarðarberjum?
Þessar myndir gleymdust í gærkvöldi:
Stígurinn sem ég hjóla í vinnuna (sæmilega upp í móti - morgunleikfimi!)
Hliðið að svæðinu þar sem m.a. GFZ-rannsóknastofnunin er.
Skrifstofan sem ég sit í er handan hægrigluggans á framhlið hússins, 1. hæð.
Yfirleitt eru komnir "venjulegir" gönguljósakallar hér í Potsdam, en þarna stendur enn einn austur-þýskur Ampelmännchen :)
Þá tvær herbergismyndir, hér sú fyrri...
... og svo sú seinni.
Bakgarðurinn, séður út um gluggann minn. Bláa laugin er notuð bæði til að kæla börn og bjór ;)
Byrjum á vinnunni ;)
Sýni tilbúið til að stinga sér á haus í...
... olíu.
Harald við sýnið áður en það fór á haus.
Hér komið á kaf í olíu, allt tengt fínt og fallegt.
Tækin sem sýna P-bylgjuhraða og viðnám sem fall af tíðni.
Erik (hönnuður tækisins) að flippa smá og David (tengiliðurinn minn).
Skrifstofan sem ég deili með Ingu (jarðeðlisfræðingur)...
... en það var einmitt hún sem hélt grillpartýið þegar opnunarleikurinn á HM var. Hún stendur hér ásamt Ali við grillið.
Ferðasaga í símskeytastíl...
Vakna kl 4 (úff), sturta, borða, BSÍ, kveðja Sigga (gaaa...), flugrúta, Guggý (skólafélagi nær allan grunnskólann, bekkjarfélagi í 10. bekk, tónskólafélagi, hin indælasta fiðlustelpa) á leið í inntökupróf í Berlín, Hannover og Amsterdam og svo í Orkester Norden. Löng biðröð í innritun: skólalúðrasveit Vesturbæjar á ferðinni og almennt margir farþegar og fá afgreiðsluborð. Flugtak 7.00, kúrilúr, lending 12.20. Kvaddi Guggý. Bilað hjól á ferðatösku á miðri 12 mín göngu á lestarstöðina, barningur með 30 kg farangur í 22°C hita. Rétt náði lest til Potsdam 13.09. Klukkutíma ferð. David Bruhn í Potsdam 14.15. Ganga í 15 mín uppímót í rannsóknarstöðina GFZ í sól og hita.
... og svo oggulítið meiri málalengingar fyrir framhaldið
David Bruhn er fínasti náungi. Jarðfræðingur. Hann hefur vesenast heilmikið fyrir mig, t.d. fundið þetta líka fína herbergi fyrir mig rétt hjá aðallestarstöð Potsdam og GFZ og fundið handa mér hjól að láni. Síðan ég kom hefur hann svo kynnt mig fyrir heilum haug af fólki (nöfnin, úffpúffpúff... ;) ), sýnt mér skrifstofuna mína, aðalbyggingu GFZ, rannsóknarstofuna og tækin sem ég mun vinna með, mötuneytið o.fl. og gefið mér ýmis góð ráð í sambandi við daglegt líf (verslanir, áhugaverðir staðir, sundlaug, ...).
Konan sem ég leigi herbergi hjá heitir Gudrun Ritter. Hún er indælismanneskja, landfræðingur (man ekki alveg við hvað hún vinnur, ef ég skildi það alveg :P ), sportleg og hress. Kann að slappa af. Herbergið mitt er vel stórt og notalegt. Stórar dyr og stór gluggi, sem til allrar hamingju vísar mót norðri því annars myndi ég bráðna þar inni (það er spáð 27-30°C hita og steikjandi sól fram á miðvikudag, hjálp!). Afslappað heimilishald. Ég sakna eiginlega bara borðtusku í eldhúsinu ;)
Í gær náði ég í reiðhjól sem einhver kona hér í GFZ var svo indæl að lána mér. Það er að vísu ekki fjallahjól og gírarnir eiginlega bara 3 þótt þeir eigi að vera 5..... en ég er þó töluvert frjálsari og sneggri á því heldur en á tveim jafnfljótum og ríkari en með strætó&sporvagni ;) Hins vegar mun ég væntanlega ekki fara í neina lengri hjóltúra á þessum annars ágæta farkosti.
Ótrúlegt en satt, þá er sundlaug rétt hjá Aðalbrautarstöðinni hér. Kostir: 50m laug, afsláttur fyrir námsmenn. Ókostir: vatn 27°C, ekki öldubrjótslínur sem skilja milli brauta (súp). Búningsklefinn er óskiptur milli kynja, en sturtuklefinn er skiptur. Fólk er svei mér þá frjálslegra hér en á Íslandi, því í búningsklefanum í gær stóðu kviknakinn karlmaður og sömuleiðis allsnakin kvenmaður og sneru bökum saman, baukandi í fataskápunum sínum. Skemmtilegt að hér sé enginn pempíuskapur eins og á bresku skólastúlkunum sem heimsækja laugarnar heima ;)
Hér er GÍFURLEG HM-stemmning og þjóðfélagið náttúrlega alveg hreint á hvolfi. Sem dæmi getur þú keypt bolla, allan fatnað, hanakamb, fána, teygjur, gúmmíarmbönd, flugnaspaða, reiðhjólahjólbarða, ... allt í þýsku fánalitunum. Svo ekur fólk um með fána síns lands út um gluggann og þeytir bílflautuna fyrir og eftir leiki og þegar það langar til. Alveg hreint dásamlegt ;) Sjónvörpin eru dregin út í garð og kynt undir grillinu í góða veðrinu. Næstum allir veitingastaðir og knæpur hafa stillt upp sjónvarpi svo einhver fáist til að borða hjá þeim...
Fólkið sem vinnur í minni byggingu (A6) og deild heldur hópinn mjög vel saman og leggur t.d. áherslu á að drekka kaffi saman. Því var auðvitað hist hjá einni konunni (Ingu sem ég deili skrifstofu með) til að grilla og horfa á opnunarleikinn núna á föstudaginn. Þau höfðu stillt upp tjaldi og reddað skjávarpa og alles. Úr varð þetta líka fína kvöld og alveg eins og pantað fyrir mig til að kynnast fólkinu, þ.e. þeim gátu komist í gleðina :)
Myndir koma síðar....
Ég mætti í vinnuna í dag eftir hádegið. Eftir rabb og ráp og humm og ha bókaði ég flug til Berlínar 1. júní-18.júlí, í samráði við Knút. Rúmum klukkutíma síðar hringdi ég og breytti flugmiðanum í brottför 8. júní, eftir að hafa spjallað við Óla Fló... Hehe, þarna er ÍSOR í hnotskurn ;) Hversu oft ætli dagsetningin muni breytast þar til ég fer? Vona nú að þetta sé fyrsta og eina breytingin... Svo eiga að taka við hinar og þessar mælingar og forritun og ýmis skemmtilegheit þegar heim kemur. Heyrist að þá stefni í að það verði einhver lifandis ósköp og hellings hellingur að gera. Ekki slæmt :)
Loks nokkrar myndir frá Stað:
 Védís Fríða með pínkuponsusmálambið Þumalínu |  Þumalína |
 Aníta Hanna |  Snati |
 Ég með risalamb sem krafðist reiptogana til að komast í heiminn. Berið saman við Þumalínu! |  Móbotnótta lambið fær sér súp |
 Védís Fríða |  Rebekka (Védís tók myndina af mömmu sinni, þ.e. ýtti á takkann ;) ) |
Komin heim. Kát og glöð og jarðtengd eftir atvikum, blá og marin eftir móðursjúka ferfætlinga á hormónatrippi, lambalykt á lúkunum, harðsperrur í upphandleggjum, ofurlítið sigg í greipunum, öll heilu fjárhúsin í poka innan um drullugallann (á leiðinni út í sjó þessa stundina, af völdum þvottavélar og hellings af sápu og vatni), 12 reyktir lundar í frystinum og eitthvað álíka af reyktum rauðmaga. Frábær jarðtenging eftir klikkun vetrarins, mæli svo sannarlega með þessu.
- Ég og móbotnótt hetja. Eitt af mörgum lömbum sem er afturfóta í burði og af þeim sökum næstum kafnað inni í mömmu sinni. Þurfti að spyrna í og toga í lambið af öllum kröftum. Það hafði það af. Ótrúlega seigt í þessum krílum! -
